Útdeila peningum til eldri borgara vegna verðbólgu

Kjartan Kjartansson skrifar 24. júní 2022 11:36

Verðbólgudraugurinn gengur ljósum logum um Danmörku líkt og mörg önnur lönd þessa dagana. Vísir/EPA

Danska þingið samþykkti að gefa tekjulágum eldri borgara fimm þúsund danskar krónur skattfrjálsar hverjum til að vega upp á móti verðbólgu og háu orkuverði. Aðgerðin á ekki að ýta undir verðbólgu.

Kostnaðurinn við fjárgjöfina er metinn á 3,1 milljarð danskra króna, jafnvirði rúmra 58 milljarða íslenskra króna. Upphæðin til hvers og eins nemur um 94 þúsund íslenskum krónum. Skatt á orku verður einnig lækkaður, að því er kemur fram í frétt Reuters-fréttastofunnar.

Til þess að koma í veg fyrir að aðgerðin sjálf leiði til aukinnar verðbólgu ætla dönsk stjórnvöld að draga úr opinberri fjárfestingu á móti. Danski seðlabankinn hafði varað við því að það að útdeila peningum til fólks gæti sett eldivið á verðbólgubálið.

Frumvarpið sem þingið samþykkti felur einnig í sig milljarða fjárveitingu til að standa undir orkuskiptum og loftslagsaðgerðum, þar á meðal til að fjármagna vindorkuver í sjó, skógrækt og kolefnisbindingu.

Danmörk Eldri borgarar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.