Hamilton harðneitar að fjarlægja glingrið

Töluvert hefur verið rætt um regluna, sem Hamilton segir koma verr niður á sér en öðrum, þar sem hann er með langflest göt á líkamanum á meðal ökuþóra í Formúlu 1. Hann kveðst ekki skilja hvers vegna þetta sé flokkað sem vandamál, þar sem hann hafi keyrt með nefhring og eyrnalokka gott sem allan sinn feril.

FIA, yfirstofnun Formúlunnar, setti reglurnar en hefur framlengt undanþágu á þeim fram yfir keppnir í Aserbaídsjan og Kanada sem fram fara 12. og 19. júní.

Áður en undanþágan var framlengd í dag þótti hætta á því að Hamilton yrði meinuð þátttaka í Mónakó-kappakstrinum sem fram fer um helgina. Hamilton lét hafa eftir sér að hann þyrfti á skurðlækni að halda ef honum yrði skylt að fjarlægja pinna úr nefi sínu.

Undanþágunni er ætlað að kaupa tíma á meðan leitað er leiða til að ökumenn geti haldið lokkum á líkamanum með öruggum hætti.

„Það er klárlega jákvætt að við vinnum þetta saman og mér finnst þeir [FIA] vera að koma lítillega til móts við okkur,“ segir Hamilton.

„En í sannleika sagt, finnst mér alltof mikilli orku og tíma vera eytt í þetta. Við eigum ekki að þurfa að taka upp þráðinn í þessu máli hverja helgi. Mikilvægari mál liggja fyrir okkur.“

Hamilton sýndi óánægju sína í verki í aðdraganda kappakstursins í Miami í upphafi maí-mánaðar þar sem hann mætti á brautina hlaðinn glingri. Hann bar að minnsta kosti fjögur hálsmen, með þrjú úr og fjóra hringi á hvorri hönd, auk eyrnalokka og nefpinna.

Hamilton er sjöfaldur heimsmeistari og freistar þess að vinna áttunda titilinn til að komast fram úr Michael Schumacher sem sá sigursælasti í sögunni. Morgunljóst er að ekki verður af því í ár en lið hans Mercedes hefur átt í fádæma vandræðum eftir mikið blómaskeið undanfarin ár.