Að minnsta kosti þrír særðir eftir stunguárás vestur af Osló

Atli Ísleifsson skrifar 20. maí 2022 08:02

Tilkynning um árásina barst lögreglu skömmu fyrir klukkan níu að norskum tíma, eða sjö að íslenskum tíma. Getty

Að minnsta kosti þrír eru særðir, þar af einn alvarlega eftir stunguárás í Numedal, um áttatíu kílómetra vestur af norsku höfuðborginni Osló, í morgun.

Á vef NRK segir að lögregla og sjúkralið sé á vettvangi og að enn sé óljóst um málsatvik. Árásarmaðurinn er þó sagður hafa verið handtekinn.

Sjónarvottar segja í samtali við norska ríkisútvarpið að mikill viðbúnaður sé á staðnum, sjúkrabílar og þrjár sjúkraþyrlur.

Tilkynning um árásina barst skömmu fyrir klukkan níu að staðartíma, eða sjö að íslenskum tíma og var búið að handtaka árásarmanninn um korteri síðar.

Uppfært 8:30: Norskir fjölmiðlar sögðu upphaflega frá því að fjórir hefðu særst í árásinni. Nú er talað um að þrír hið minnsta hafi særst og þar af einn alvarlega.

Noregur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.