Hyggjast greiða í­búum Kópa­vogs og Reykja­nes­bæjar fyrir að endur­vinna

Um er að ræða tilraunaverkefni til þriggja ára og hafa sveitarfélögin samþykkt að ganga til samninga við fyrirtækið um uppsetningu stöðvanna. Gert er ráð fyrir að allt að fimm móttökustöðvar verði reistar í september hjá sveitarfélögunum og fyrirtækjum og fleiri fylgi í kjölfarið.

Sigurður Halldórsson, forstjóri Pure North, segir í samtali við Vísi að tekið verði á móti öllu endurvinnanlegu hráefni sem fellur til í venjulegu heimilishaldi, þar á meðal plasti, pappa og áli. Í fyrstu verði greitt flatt verð eftir vigt óháð efni en ekki liggi fyrir hver upphæðin verði á þessari stundu. 

Sigurður segir að upphæðirnar verði ekki háar til að byrja með en reynt verði að byggja ofan á þær þegar reynsla er komin á kerfið og greiða meira fyrir ákveðna endurvinnsluflokka. Sömuleiðis muni verð á mörkuðum hafa þar áhrif. Hann bætir við að fyrirtækið sé í viðræðum við önnur sveitarfélög á höfuðborgarsvæðinu og á landsbyggðinni.  

Klár verðmæti í endurvinnsluefnum

„Við erum að bregðast við breyttum tímum og breyttum áherslum í úrgangs- og umhverfismálum, koma þessum málum í gagnsætt ferli svo menn hafi trú á kerfinu og viti í hvaða farveg hráefnin lenda. Það eru verðmæti í endurvinnsluefnum og við erum bara að koma þessu beint í gegn,“ segir Sigurður.

Úrgangsstjórnunarkerfið sé einstakt tækifæri til að hækka endurvinnsluhlutfall heimilisúrgangs. Hlutfallið á Íslandi er í dag með því lægsta í Evrópu eða 27% miðað við árið 2019.

Pure North stefnir að því að endurvinna sem mest af plastinu sem tekið verður á móti í plastendurvinnslu sinni í Hveragerði og bindur svo vonir við að geta hafið endurvinnslu á öðrum efnum þegar magnið er orðið nægt til að standa undir slíkum rekstri. Fram að því verður efnið sent til erlendra aðila til endurvinnslu. 

Þörf á átaki svo Ísland nái markmiðum

Haft er eftir Sigurði í tilkynningu að fjárhagslegur hvati hafi gefist vel við skil á drykkjarumbúðum um árabil og dæmi erlendis sanni að fjárhagsleg hvatakerfi virki best til að fá íbúa til að skila efnum í endurvinnslu, bæta árangur í flokkun og auka hreinleika endurvinnsluefna.

„Átaks er þörf ef Íslandi á að takast að standa við alþjóðlegar skuldbindingar á allra næstu árum en ný markmið um endurvinnsluhlutfall heimilisúrgangs munu hækka úr 50% í 65% á næstu 13 árum,“ segir í tilkynningunni.

Íbúar muni geta fylgst með sínum árangri í flokkun og skilum í gegnum smáforrit og til standi að veita sveitarfélögum bætt aðgengi að upplýsingum um uppruna, magn og gæði efna sem skili sér í endurvinnslu.

Pure North endurvinnur plast í starfsstöð sinni í Hveragerði og endurvinnur megnið af því heyrúlluplasti sem til fellur á Íslandi. 

Stefnir fyrirtækið á endurvinnslu 2.500 tonna á árinu 2022 sem gæti að sögn Pure North orðið um helmingur alls þess plasts sem er endurunnið frá Íslandi í dag. Fyrirtækið nýtir jarðgufu við endurvinnsluferlið sem vistferilsgreining bendir til að skili um 82% lægra kolefnisspori á hvert unnið tonn af plasti samanborið við sambærilega endurvinnslu í Evrópu.

Fréttin hefur verið uppfærð.