Golf

For­seti GSÍ: Lands­byggðin þarfnast stuðnings við út­breiðslu

Runólfur Trausti Þórhallsson skrifar
Hulda (fyrir miðju).
Hulda (fyrir miðju). GSÍ

Golfsamband Íslands hélt kynningafund þar sem golfsumarið 2022 var kynnt. Hulda Bjarnadóttir tók nýverið við sem forseti GSÍ og var rætt við hana í Sportpakka Stöðvar 2 varðandi helstu áherslur nýrrar stjórnar Golfsambands Íslands.

„Erum að halda áfram að byggja upp og breiða út boðskapinn um golf á Íslandi. Þurfum að skipta þessu upp þar sem þið hafið mögulega heyrt umræðuna varðandi höfuðborgina og landsbyggðina,“ sagði Hulda og hélt áfram.

„Landsbyggðin þarfnast stuðnings við útbreiðslu. Við ætlum að taka mótaröð bara til að fara út í landshlutana og styðja við þar. Skilja eftir þekkingu og hjálpa þeim þá að byggja upp sportið, það er skýrt markmið hjá okkur. Svo bara halda áfram að styðja við það sem vel er gert, byggja undir landsliðin okkar enn frekar og afreksstarf.“

„Þetta er svo blómlegt í ár og sérlega spennandi með EM, HM, aldrei fleiri kylfingar á mótaröðum og svo framvegis. Þetta er allt sem við erum að styðja við.“

Helstu breytingar sumarsins

„Við byrjuðum í fyrra að fyrrum Íslandsmeistarar í holukeppni fengju að vera með að uppskyldum forgjafarskilyrðum en það er ótrúlega gaman fyrir þá að fá að vera með. Ef þeir eru dottnir út úr forgjafaflokknum að spila sig inn aftur. Það var nýjungin sem Ólafur Loftsson, afreksstjóri, fór yfir á fundinum.“

„Líka nýtt að við erum að keyra heilsárs starfsemi hvað mótahald varðar. Vorum með landsmót í golfhermum. Þetta var keyrt í samstarfi við GKG sem fór fyrir framkvæmdinni. Það er spennandi að sjá golfíþróttina verða að heilsárssporti með allri þessari flottu inniaðstöðu sem er við að byggja upp.“

Lýðheilsumarkmið GSÍ

„Þurfum að kynna betur lýðheilsu rannsóknir sem hreinlega eru til. Við erum að lengja líf fólks, helmingur hreyfingarinnar er 50 ára eða eldri. Sveitafélög þurfa að kynna sér kosti golfíþróttarinnar. Þetta eru samtöl sem við viljum auka og breiða boðskapinn út um hversu öflug þessi almenningsíþrótt er,“ sagði Hulda að endingu.

Klippa: Hulda, formaður GSÍ: Landsbyggðin þarfnast stuðnings við útbreiðslu.



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.