Innlent

Einn vill meira millilandaflug, annar vill breyta í íbúðabyggð

Kristján Már Unnarsson skrifar
Færeyska flugfélagið Atlantic Airways sinnti áður millilandaflugi með Airbus-þotum um Reykjavíkurflugvöll en því lauk haustið 2018.
Færeyska flugfélagið Atlantic Airways sinnti áður millilandaflugi með Airbus-þotum um Reykjavíkurflugvöll en því lauk haustið 2018. Stöð 2/Skjáskot.

Tvö lítt áberandi smáframboð í borgarstjórnarkosningunum eiga það sammerkt að setja Reykjavíkurflugvöll á oddinn, en eru þó algerlega á öndverðum meiði; annað vill flugvöllinn burt sem fyrst en hitt vill efla hann sem mest.

Í fréttum Stöðvar 2 var sýnt frá fundi sem Y-listi Ábyrgrar framtíðar stóð fyrir síðdegis á gamla Loftleiðahótelinu, nú Hótel Natura, til stuðnings flugvellinum.

Frá fundi Y-listans á gamla Loftleiðahótelinu nú síðdegis.Sigurjón Ólason

„Við sjáum að það er bara mjög slæmt að missa flugvöllinn úr Reykjavík. Við erum með miklu fleiri mál en þetta. En þetta er gríðarlega mikilvægt mál,“ segir Jóhannes Loftsson, oddviti Y-lista Ábyrgrar framtíðar.

Gunnar H. Gunnarsson fer fyrir E-listanum, sem forsvarmenn Betri byggðar standa að, en þeir hafa lengi barist gegn flugvellinum.

Gunnar H. Gunnarsson er oddviti E-listans, sem vill leggja af flugvöllinn.Sigurjón Ólason

„Þetta er risastórt mál. Menn eru að tala jafnvel um að það vanti stórt mál til að kjósa um. Þetta er ofboðslega stórt mál,“ segir Gunnar H. Gunnarsson, oddviti E-lista Reykjavíkur, bestu borgarinnar.

E-listinn vill sjá flugvallarsvæðið tekið undir íbúðir, eins og gerðist með Hlíðarendahverfinu. Y-listinn vill sjá betri aðstöðu fyrir millilandaflug.

„Við sjáum tækifæri í því að ef við færum að efla flugið, meðal annars með því að leyfa meira millilandaflug, sem er mjög hagkvæmt, þá myndum við fá meiri tekjur til þess að þróa völlinn aðeins betur,“ segir Jóhannes.

Jóhannes Loftsson, oddviti Y-listans, sem vill efla flugvöllinn.Sigurjón Ólason

„En flugvöllurinn er bara á vitlausum stað. Vegna þess að þetta er besta lóð á Íslandi til þess að byggja á. Til þess að efla borgina er þetta alveg nauðsynlegur staður til að byggja á,“ segir Gunnar.

„Ég gæti alveg séð fyrir mér að það væri hægt að fljúga til London. Þar eru þeir með flugvöll í miðbænum.

Þetta myndi spara í ferðatíma, fram til baka, dæmigert fjórar klukkustundir. Þetta gæti sparað í ferðakostnaði, um kannski þrjátíuþúsund kall,“ segir Jóhannes.

„Það er verið að fikta við að þétta byggð núna á höfuðborgarsvæðinu. En þetta er alvöru þétting þegar byggt verður hérna.

Þjóðhagslega er þetta rosalega arðsamt, alveg gríðarlega arðsamt. Það eru milljarðatugir sem tapast á hverju ári við að byggja þarna ekki,“ segir Gunnar.

Hér má sjá frétt Stöðvar 2:

Reykjavíkurflugvöllur Sveitarstjórnarkosningar 2022 Fréttir af flugi Reykjavík

Tengdar fréttir

Tókust á um lóðarúthlutun á landi innan flugvallargirðingar

Átök urðu á fundi borgarráðs Reykjavíkur í dag um þá tillögu borgarstjóra að úthluta fimm þúsund fermetra lóð og byggingarrétti fyrir allt að 140 íbúðir við Einarsnes 130. Lóðin er núna innan flugvallargirðingar í svokölluðum Nýja Skerjafirði á svæði sem Sigurður Ingi Jóhannsson innviðaráðherra lýsti yfir í gær að borgin fengi ekki afhent meðan ekki væri kominn betri flugvallarkostur í stað Reykjavíkurflugvallar.

Stytta ferðatímann milli London og Keflavíkur

Breska flugfélagið British Airways hefur ákveðið að hefja beint flug til Íslands í haust frá London City-flugvellinum sem styttir ferðatímann frá miðborg Lundúna.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið