Innherji

BlueBay rennir hýru auga til íslenskra ríkisbréfa

Þorsteinn Friðrik Halldórsson skrifar
BlueBay hóf kaup á íslenskum ríkisskuldabréfum árið 2015. 
BlueBay hóf kaup á íslenskum ríkisskuldabréfum árið 2015.  VÍSIR/VILHELM

Ísland er að verða áhugaverður kostur fyrir skuldabréfafjárfesta á ný en það er mat sjóðstjóra BlueBay Asset Management, eins stærsta sérhæfða skuldabréfastýringarfyrirtæki Evrópu. Fyrirtækið var um tíma stærsti erlendi eigandi íslenskra ríkisbréfa.

„Eftir nokkur ár á hliðarlínunni teljum við að íslenski markaðurinn sé að verða áhugaverður ný,“ segir í fréttabréfi sem sjóðstjóri hjá BlueBay sendi á viðskiptavini fyrirtækisins í apríl. Hann segir að ávöxtun skuldabréfa á Íslandi hafi, eins og annars staðar, farið hækkandi samhliða hækkandi vaxtastigi. Hagkerfið sé að koma út úr faraldrinum og hagvöxtur að festa sig í sessi.

„Ísland ætti að endurheimta viðskiptaafgang á þessu ári eftir því sem ferðamannastreymið eykst. Þetta gæti skapað þrýsting á gengið, sem skapar áhugaverð tækifæri gagnvart evrunni,“ segir í fréttabréfinu.

Litið fram á veginn má búast við að það verði samleitni milli Íslands og annarra Evrópuríkja, bæði hvað varðar efnahagsþróun og fjármálamarkaði.

BlueBay hóf innreið sína á íslenska skuldabréfamarkaðinn árið 2015 og var um tíma stærsti erlendi eigandi íslenskra ríkisskuldabréfa. Á seinni hluta árs 2020 seldi fyrirtækið allar ríkisbréfaeignir sínar á Íslandi fyrir nærri 50 milljarða króna. Salan, sem náði yfir liðlega þriggja mánaða tímabil, knúði fram umfangsmestu gjaldeyrissölu Seðlabanka Íslands á einni viku frá fjármálahruninu.

„Litið fram á veginn má búast við að það verði samleitni milli Íslands og annarra Evrópuríkja, bæði hvað varðar efnahagsþróun og fjármálamarkaði. Með ávöxtun langtímaskuldabréfa aftur yfir 5 prósent og sterkar undirstöður til meðallangstíma teljum við að Íslandi bjóði upp á áhugaverð tækifæri með tilliti til áhættu,“ segir í fréttabréfinu.

Sjóðstjóri BlueBay er bjartsýnn á verðbólguþróun á Íslandi. Hann segir á að sögulega hafi launahækkanir verið stór þáttur í verðlagsbreytingum en eftir undirritun kjarasamninga árið 2021 eigi launahækkanir að vera „minna áhyggjuefni“ á næstu mánuðum.

„Þar af leiðandi,“ bætir hann við, „er búist við að verðbólga fari úr 6,7 prósent niður í 3-4 prósent fyrir árslok og enn neðar árið 2023.“

Verðbólga mældist 7,2 prósent í apríl og vænta markaðsaðilar þess, samkvæmt niðurstöðum könnunar sem Innherji birti í morgun, að Seðlabankinn muni hækka vexti um 75 eða 100 punkta á næsta vaxtaákvörðunarfundi á miðvikudaginn. Laust taumhald peningastefnu, mjög lágir raunstýrivextir og vaxandi verðbólguþrýstingur voru meginstef í þeim svörum sem bárust.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.