KA unnið sex oddaleiki í átta liða úrslitum í röð

Það ræðst í kvöld hvort Haukar eða KA fara í undanúrslit Olís-deildarinnar sem hefjast um helgina. Báðir leikirnir hingað til hafa verið æsispennandi og unnist á útivelli. 

KA vann fyrsta leikinn á Ásvöllum, 29-30, þökk sé marki Óðins Þór Ríkharðssonar úr vítakasti eftir að leiktíminn rann út. Haukar svöruðu fyrir sig með eins marks sigri í KA-heimilinu á mánudaginn, 22-23, og því ráðast úrslit einvígisins í oddaleik í kvöld.

Þetta er í fyrsta sinn síðan 2004, eða í átján ár, sem KA fer í oddaleik í átta liða úrslitum. KA vann þá fjögurra marka sigur á Fram, 34-30, í KA-heimilinu. Arnór Atlason var markahæstur KA-manna með ellefu mörk. Jónatan Magnússon, þjálfari KA í dag, skoraði sjö mörk. KA féll svo úr leik í undanúrslitunum fyrir Haukum, 2-1.

Sigur KA-manna á Frömmrunum 2004 var sjötti sigur þeirra í oddaleik í átta liða úrslitum í röð. KA tapaði tveimur fyrstu oddaleikjum sínum í átta liða úrslitum í úrslitakeppninni, gegn ÍBV 1992 og Selfossi 1994, en vann svo sex oddaleiki í röð. KA vann Stjörnuna í oddaleik 1995 og 1997, Selfoss 1996, FH 2000, ÍR 2001 og Fram 2004.

KA komst í úrslitakeppnina í fyrra, í fyrsta sinn síðan 2005, en tapaði fyrir Val, 63-54 samanlagt. Þá réði samanlagt markaskor í tveimur leikjum úrslitum.

Í ár er keppt með hefðbundnu fyrirkomulagi og vinna þarf tvo leiki til að komast áfram í undanúrslit. Og ef KA leikur sama leik og á föstudaginn kemst liðið í undanúrslit í fyrsta sinn í átján ár.

Mótherjunum, Haukum, hefur einnig vegnað vel í oddaleikjum í átta liða úrslitum úrslitakeppninnar. Haukar töpuðu fimm af fyrstu sex oddaleikjum sínum í átta liða úrslitum en hafa unnið sex af sjö síðan þá. Eina tapið kom fyrir Fram í frægum leik 2017 þar sem úrslitin réðust í vítakastkeppni.

Haukar þurftu síðast að fara í oddaleik í átta liða úrslitum 2019. Þeir unnu þá öruggan sigur á Stjörnunni, 30-23. Haukar fóru alla leið í úrslit en töpuðu fyrir Selfossi, 3-1.