Sé rangt hjá Bjarna að enginn hafi getað selt strax með tíu milljóna hagnaði

Páll, sem er fyrrverandi þingmaður Sjálfstæðisflokksins, greindi frá viðskiptunum fyrir rúmum tveimur vikum og olli frásögnin nokkru fjaðrafoki. Bjarni sat fyrir svörum hjá Kristjáni Kristjánssyni í Sprengisandi á Bylgjunni í gær og sagði það hafa verið ómögulegt fyrir selja hlut sem fenginn var í útboðinu strax daginn eftir.

„Hvernig stendur á því að blaðamenn flytja svona vitleysu umbúðalaust og fleyta þessu áfram í umræðuna þegar allir vita að í fyrsta lagi var uppgjörsdagur á mánudegi og útboðið fór fram á þriðjudegi? Það gat enginn selt daginn eftir,“ sagði Bjarni.

Ummælin komi á óvart

Páll furðar sig á þessum ummælum fjármálaráðherra. „Þessi fullyrðing ráðherrans er röng. Og kemur nokkuð á óvart að maður sem sjálfur hefur víðtæka reynslu af allskonar viðskiptavafningum frá því fyrir hrun skuli halda þessu fram.“

Meðal annars hafi verið hægt að selja hluti í gegnum framvirka samninga og með því að selja þá til þriðja aðila með þeim skilmálum að afhending færi fram eftir sex daga, eða að loknu uppgjöri seljandans við Bankasýslu ríkisins.

„Þriðja leiðin var síðan einföldust og fljótlegust, hafi kaupandinn átt fyrir jafnmörg eða fleiri bréf í Íslandsbanka: Kostaboðinu tekið – milljón bréf keypt með afslætti á genginu 117 – og jafnmörg bréf úr gamla stabbanum seld þegar þau voru komin upp í 127 í Kauphöllinni daginn eftir. Vissulega ekki „sömu“ bréfin og hann fékkst beinlínis í hendur en „snúningurinn“ sá sami og sömu 10 milljónirnar komnar í hús. Eignarhlutur viðkomandi í Íslandsbanka sá sami fyrir og eftir - og ekkert hafði gerst annað en að hann græddi þessar 10 milljónir á meðan hann svaf,“ segir Páll í grein sem birtist á Vísi.

Hann bætir við að tæknileg útfærsla umræddra viðskipta væri algjört aukaatriði og að þessi hluti málsins snúist fyrst og fremst um það hvernig aðilar voru valdir sem fengu að kaupa hluti í Íslandsbanka með afslætti.

Sagði einnig vel hægt að selja hluti strax

Páll er ekki sá fyrsti sem gerir athugasemdir við ummæli Bjarna í Sprengisandi en Kristrún Frostadóttir, þingmaður Samfylkingarinnar, hefur jafnframt sagt að þau standist ekki skoðun.

„Það er hægt að gera framvirkan samning á fjármálamarkaði á þann veg að viðkomandi þarf í raun aldrei að fá bréfin í hendurnar áður en viðkomandi selur. Afhending bréfa er venjulega T+2 (2 dögum eftir kaup) og það að selja T+3 (þremur dögum eftir kaup) er líka ein leið til að segja að eitthvað hafi verið selt strax,“ skrifaði Kristrún í grein á Vísi í gær.

Sagan hafi tekið breytingum

Bjarni svarar Páli á Facebook og segir sögu hans nú hafa tekið miklum breytingum. Umræddur maður hafi ekki lengur tekið þátt í útboðinu og selt bréfin næsta dag heldur gert afleiðusamning og selt framvirkt nálægt hæsta gengi sem greitt hafði verið fyrir bréf í Íslandsbanka frá almenna útboðinu.

Jafnvel þótt þetta stæðist allt skoðun væri það engan veginn lýsandi fyrir dagana eftir söluferlið.

Fréttin hefur verið uppfærð með viðbrögðum fjármálaráðherra.