Þetta kemur fram í nýbirtum ársreikningi en stjórn félagsins leggur til að 343 milljónir króna verði greiddir í arð til hluthafa. Stærstu eigendur Arctica Finance eru Bjarni Þórður Bjarnason, aðstoðarframkvæmdastjóri fyrirtækisins, og Stefán Þór Bjarnason, framkvæmdastjóri, með samanlagt 50 prósenta hlut.
Starfsmenn félagsins voru að meðaltali 17 talsins á síðasta ári, sem er einu meira en árið áður, en launakostnaður jókst um 40 milljónir og var tæplega 324 milljónir. Bókfært eigið fé stóð í 592 milljónum króna í árslok 2021 og eiginfjárhlutfallið var 32 prósent.
Á árinu 2021 var eignastýringarstarfsemi Arctica Finance efld og samhliða var stofnað dótturfélagið A/F Rekstraraðili ehf. sem sér um rekstur sérhæfðra sjóða. Fram kemur í ársreikningi að Arctica hafi verið með eignir í stýringu og vörslu hjá sér fyrir sína viðskiptavini að fjárhæð rúmlega 17 milljarða króna í lok árs.
Síðasta ár var gjöfult á verðbréfamarkaði veltan í viðskiptum með hlutabréf jókst verulega og fjórar nýskráningar voru í Kauphöllinni. Hlutdeild Arctica Finance í viðskiptum með hlutabréf var um 5,5 prósent en í skuldabréfum var hlutdeild félagsins tæplega 6,4 prósent.
Arctica Finance var umsjónar- og söluaðili við skráningu og hlutafjárútboð Play í júní en fyrr á árinu hafði félagið einnig haft umsjón með lokuðu útboði félagsins. Þá var Arctica meðal annars ráðgjafi Haga við kaup smásölurisans og Regins á nýju hlutafé í Klasa auk þess að vera ráðgjafi Nordic Visitor sem keypti ferðaþjónustufyrirtækið Iceland Travel af Icelandair á liðnu ári.
