Annar mannanna í gæsluvarðhald en hinum sleppt

Atli Ísleifsson skrifar 10. febrúar 2022 14:57

Vitað er að Mia Skadhauge Stevn hafði verið að skemmta sér á Jomfru Ane Gade í Álaborg, gengið svo Borgergade til vesturs og svo Vesturbrú til suðurs þar sem hún settist upp í bílinn. Lögregla í Danmörku

Dómari í Álaborg hefur úrskurðað 36 ára karlmann í fjögurra vikna gæsluvarðhalds vegna hvarfs hinnar 22 ára Mia Skadhauge Stevn. Lögregla handtók tvo karlmenn, báða 36 ára, vegna málsins í gær og hefur hinn nú verið látinn laus. Saksóknarar hafa hins vegar áfrýjað þeirri ákvörðun dómsins.

Frá þessu segir í frétt DR. Þar segir að báðir menn neiti sök í málinu sem vakið hefur mikla athygli í Danmörku síðustu daga.

Ekkert hefur spurst til Mia Skadhauge Stevn frá því að sást til hennar á öryggismyndavélum stíga upp í bíl í miðborg Álaborgar á Jótlandi snemma á sunnudagsmorgun.

Lögregla og aðrir viðbragðsaðilar hafa haldið leitinni að Miu Skadhauge Stevn áfram í dag og var meðal annars leitað við sorpvinnslustöð skammt frá Álaborg í morgun. Leitin hefur þó enn engan árangur borið.

Mennirnir tveir voru handteknir í Østervrå annars vegar og Flauenskjold hins vegar, klukkan 11 að staðartíma í gær. Báðir staðir eru norður af Álaborg á Jótlandi. Á öðrum staðnum var hald lagt á dökkmálaðan bíl sem svipaði til þess bíls sem sést á öryggismyndavélum og konan steig upp í eftir um tíu sekúndna spjall við ökumann eða farþega.

Mennirnir voru handteknir í gær vegna gruns um að hafa banað konunni, líkt og sagði í tilkynningu lögreglu.

Vitað er að konan hafði verið að skemmta sér á skemmtistaðagötunni Jomfru Ane Gade, gengið svo Borgergade til vesturs og svo Vesturbrú til suðurs þar sem hún settist upp í bílinn.

Danmörk Erlend sakamál

Tengdar fréttir

Tveir handteknir vegna gruns um að tengjast hvarfi á 22 ára konu í Álaborg

Lögregla í Danmörku hefur handtekið tvo 36 ára karlmenn vegna gruns um að tengjast hvarfinu á hinni 22 ára Mia Skadhauge Stevn. Ekkert hefur spurst til konunnar frá því að sást til hennar á öryggismyndavélum stíga upp í bíl í miðborg Álaborgar á Jótlandi snemma á sunnudagsmorgun, en málið hefur vakið mikla athygli í Danmörku.

9. febrúar 2022 13:06

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir