Körfubolti

Kyrie Irving með en Brooklyn Nets tapaði

Óskar Ófeigur Jónsson skrifar
Kyrie Irving vill ekki láta bólusetja sig og má því ekki spila heimaleiki Brooklyn Nets.
Kyrie Irving vill ekki láta bólusetja sig og má því ekki spila heimaleiki Brooklyn Nets. AP/Darron Cummings

Brooklyn Nets var að spila á útivelli í NBA-deildinni í nótt og þessa vegna óbólusetta stórstjarnan Kyrie Irving spilað með liðinu. Það dugði þó ekki til í nótt.

Kyrie Irving skoraði 22 stig en Brooklyn Nets varð að sætta sig við 114-108 tap á móti Portland Trail Blazers og það þótt að Damian Lillard hafi ekki spilað með Portland vegna meiðsla. Nets liðið var reyndar án James Harden en félagið vill ekki taka neina áhættu með hnémeiðsli hans.

Brooklyn Nets vann fyrsta leikinn og eina leikinn sem Kyrie Irving hafði spilað á tímabilinu en þá var hann líka með 22 stig. Irving hitti hins vegar aðeins úr 9 af 21 skoti sínu í nótt. Kevin Durant var atkvæðamestur í liðinu með 28 stig, 10 fráköst og 5 stoðsendingar.

Þrír leikmenn Portland skoruðu tuttugu stig eða meira í leiknum. Anfernee Simons var með 23 stig, 6 fráköst og 11 stoðsendingar, Robert Covington skoraði 21 stig (5 af 7 í þriggja stiga skotum) og Ben McLemore var með 20 stig.

Joel Embiid átti enn einn stórleikinn þegar Philadelphia 76ers vann sinn sjöunda sigur í röð. Embiid skoraði 31 stig og tók 8 fráköst í 111-91 útsigri á Houston Rockets. Með þessu varð hann aðeins annar leikmaðurinn í sögunni til að skora nákvæmlega 31 stig í fjórum leikjum í röð á eftir Bob McAdoo sem gerði það í nóvember 1973.

Philadelphia 76ers er nú með lengstu lifandi sigurgönguna í Austurdeildinni og þá næstlengstu í deildinni á eftir Memphis Grizzlies sem hefur unnið níu leiki í röð.

Jaylen Brown var með 26 stig og Jayson Tatum skoraði 24 stig þegar Boston Celtics vann Indiana Pacers í framlengdum leik en Domantas Sabonis var með þrennu hjá Indiana, 11 stig, 23 fráköst og 10 stoðsendingar. Þetta var fjórði sigur Boston liðsins í síðustu sex leikjum.

Nýliðinn Cade Cunningham, sem var valinn fyrstur í nýliðavalinu í fyrra, setti persónulegt met með því að skorað 29 stig í óvæntum sigri Detroit Pistons á Utah Jazz. Cunningham skoraði 18 af 29 stigum sínum í þriðja leikhlutanum þar sem Detriot liðið vann upp 22 stiga forskot. Pistons menn hafa unnið fjóra af sex leikjum á nýju ári eftir átján töp í síðustu nítján leikjum sínum á árinu 2021.

Charlotte Hornets vann meistara Milwaukee Bucks annað kvöldið í röð en Terry Rozier skorðai 27 stig og LaMelo Ball var með 18 af 23 stigum sínum í seinni hálfleik þegar Hornets vann 103-99 sigur á Bucks. Þetta var sjötti sigur liðsins í átta leikjum. Khris Middleton var með 27 stig og 11 stoðsendingar hjá Milwaukee og Giannis Antetokounmpo var með 26 stig, 13 fráköst og 8 stoðsendingar.

  • Úrsltin í NBA-deildinni í nótt:
  • Portland Trail Blazers - Brooklyn Nets 114-108
  • Sacramento Kings - Cleveland Cavaliers 108-109
  • Boston Celtics - Indiana Pacers 101-98 (framlengt)
  • Houston Rockets - Philadelphia 76ers 91-111
  • New York Knicks - San Antonio Spurs 111-96
  • Detroit Pistons - Utah Jazz 126-116
  • Charlotte Hornets - Milwaukee Bucks 103-99

Lögmál leiksins er vikulegur þáttur um NBA-deildinni sem er sýndur á mánudögum á Stöð 2 Sport 2. NBA-deildin er hluti af Sport Erlent sem kostar kr. 3.990 á mánuði. Smelltu hér til að kaupa áskrift.

NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.