Innherji

Guðni í Apple umboðinu kaupir fimm prósenta hlut í Skeljungi

Hörður Ægisson skrifar
Skeljungur rekur meðal annars 60 bensínstöðvar undir merkjum Orkunnar á Íslandi.
Skeljungur rekur meðal annars 60 bensínstöðvar undir merkjum Orkunnar á Íslandi.

Félagið GE Capital í eigu Guðna Rafns Eiríkssonar, fjárfestis og eiganda Apple umboðsins á Íslandi, hefur bæst við hluthafahóp Skeljungs með kaupum á rétt yfir fimm prósenta hlut.

Kaupverðið á samanlagt 97,34 milljónum hluta að nafnvirði var á genginu 14,6 krónur á hlut og nam því um 1.420 milljónum króna. Viðskiptunum var flaggað í Kauphöllinni rétt í þessu en þau áttu sér stað í gær samhliða því að bandaríski vogunarsjóðurinn keypti sömuleiðis fimm prósenta hlut en á sama tíma seldu lífeyrissjóðirnir Gildi og Birta samtals hátt í tíu prósenta hlut í félaginu.

Hlutabréfaverð Skeljungs hækkaði um liðlega 4,3 prósent í þriggja milljarða króna viðskiptum í gær og stóð gengið í 14,7 krónum á hlut við lokun markaða. Veltan í dag hefur numið um 300 milljónum og gengið hefur staðið í stað.

Guðni Rafn, sem eignaðist félagið sem er dreifingaraðili Apple á Íslandi í árslok 2016, er meðal annars einnig á meðal eigenda pizzustaðarins Spaðans ásamt þeim Þórarni Sævarssyni, framkvæmdastjóra fyrirtækisins, og Jóni Pálmasyni, annar eigenda IKEA á Íslandi. Kaup Guðna í Skeljungi eru gerð í gegnum eignarhaldsfélagið GE Capital en það hagnaðist um 340 milljónir króna á árinu 2020 og eigið fé þess var rúmlega 1.200 milljónir í lok þess árs.

Eftir sölu Gildis og Birtu í Skeljungi hefur samanlagður eignarhlutur lífeyrissjóða í Skeljungi minnkað enn frekar og er nú rétt yfir 20 prósent. Frjálsi er með stærsta eignarhlutinn af lífeyrissjóðunum en hann nemur í dag um átta prósentum en aðrir sjóðir eiga allir undir fimm prósent.

Guðni Rafn Eiríksson hefur verið eigandi Epli, umboðsaðila Apple á Íslandi, frá árinu 2016.

Fjárfestingafélagið Strengur, sem hjónin Ingibjörg Pálmadóttur og Jón Ásgeir Jóhannesson og Sigurður Bollason fara meðal annars fyrir, er sem kunnugt er með rúmlega 50 prósenta hlut í Skeljungi eftir að hafa fjármagnað skuldsetta yfirtöku á félaginu í ársbyrjun 2021.

Verulegar breytingar hafa orðið á starfsemi Skeljungs að undanförnu þar sem eignir hafa verið seldar, reksturinn stokkaður upp með stofnun nýrra dótturfélaga og tilgangi félagsins breytt þannig að megintilgangur þess verði fjárfestingastarfsemi. Þá hafa stjórnendur Skeljungs hætt við fyrri áform sín um afskráningu heldur er nú horft til þess að starfrækja fjárfestingafélag sem verður skráð á hlutabréfamarkað.

Í lok síðasta árs gekk Skeljungur frá sölu á Magni til Sp/f Orkufélagsins. Endanlegt kaupverð nam 12,2 milljörðum króna en Skeljungur er skuldbundinn til að endurfjárfesta 2,8 milljörðum króna í Orkufélaginu gegn því að eignast ríflega 48 prósenta hlut. Þá skrifaði Skeljungur undir viljayfirlýsingu um sölu fasteigna fyrir 8,8 milljarða króna til fasteignaþróunarfélagsins Kaldalóns. Þeir fjárfestar sem standa að baki Strengi eru sömuleiðis ráðandi hluthafar í Kaldalóni.

Hlutabréfaverð Skeljungs hefur hækkað um liðlega sextíu prósent á undanförnum tólf mánuðum og er markaðsvirði félagsins í dag um 28 milljarðar króna.


Tengdar fréttir

Fjármálastjóri Eskju og eigandi ÞG Verks taka sæti í stjórn Magns

Páll Snorrason, framkvæmdastjóri fjármála- og rekstrarsviðs Eskju, og Þorvaldur Gissurarson, forstjóri og eigandi verktakafélagsins ÞG Verks, hafa tekið sæti í stjórn færeyska félagsins P/F Magn. Þetta kemur fram í frétt færeyska miðilsins KVF.

Fjárfestar veðji á mikinn söluhagnað hjá Skeljungi

Verðmatsgengi Skeljungs, samkvæmt greiningu Jakobsson Capital, hljóðar upp á 11 krónur á hlut en markaðsgengi smásölufélagsins er í dag 13,9 krónur, eða 26 prósentum hærra. Í verðmatinu er þó lögð áhersla á að verðmatsgengið segi aðeins hálfa söguna í ljósi þess að Skeljungur er í miklum breytingafasa.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.