Enski boltinn

Klopp er vongóður um að Salah skrifi undir nýjan samning

Hjörtur Leó Guðjónsson skrifar
Jürgen Klopp, knattspyrnustjóri Liverpool, er vongóður um að Mohamed Salah skrifi undir nýjan samning við félagið í náinni framtíð.
Jürgen Klopp, knattspyrnustjóri Liverpool, er vongóður um að Mohamed Salah skrifi undir nýjan samning við félagið í náinni framtíð. Phil Noble - Pool/Getty Images

Jürgen Klopp, knattspyrnustjóri Liverpool, segist vera vongóður um það að sóknarmaður liðsins, Mohamed Salah, skrifi undir nýjan samning við félagið. Erfiðlega hefur gengið að semja við Egyptann, en hann er sagður vilja fá meira greitt en félagið er tilbúið að greiða honum.

Salah hefur verið einn besti leikmaður ensku úrvalsdeildarinnar undanfarin ár, og er sem stendur markahæsti maður deildarinnar með 13 mörk í 15 leikjum. Hann gekk til liðs við Liverpool árið 2017, en núverandi samningur hans rennur út sumarið 2023.

Þrátt fyrir að erfiðlega hafi gengið að fá leikmanninn til að skrifa nafn sitt á nýjan og framlengdan samning við Liverpool, segist stjóri félagsins, Jürgen Klopp, vera vongóður um að það gerist í náinni framtíð.

„Við erum búnir að vera að spjalla saman. Að framlengja samningi við leikmann eins og Salah er ekki eitthvað sem þú gerir yfir tebolla og kemst að samkomulagi seinni partinn,“ sagði Klopp.

Hann tók einnig fram að engin leiðindi séu á milli þeirra tveggja.

„Salah er góður, ég er góður. Það sem við viljum öll er augljóst. Svona hlutir taka tíma.“

„Ég held að við viljum öll leysa þetta. Það tekur bara tíma, þannig er það bara.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.