Erlent

Yfirmaður hjá Sony rekinn eftir birtingu tálbeitumyndbands

Samúel Karl Ólason skrifar
Hópur sem kallast People V Preds eða PVP birti skjáskot sem eiga að sýna samskipti Cacioppio og þess sem þóttist vera, og sagðist vera, fimmtán ára gamall drengur.
Hópur sem kallast People V Preds eða PVP birti skjáskot sem eiga að sýna samskipti Cacioppio og þess sem þóttist vera, og sagðist vera, fimmtán ára gamall drengur. Skjáskot

Sony hefur rekið George Cacioppo, varaforstjóra verkfræðideildar fyrirtækisins, eftir að hann birtist í myndbandi hóps sem segist koma upp um barnaníðinga. Cacioppo er sagður hafa mælt sér móts við fimmtán ára dreng en í rauninni mætti til hans maður með myndavél.

Hópurinn, sem kallast People V Preds eða PVP birti skjáskot sem eiga að vera samskipti Cacioppio og þess sem þóttist vera, og sagðist vera, fimmtán ára gamall drengur. Samskipti þessi fóru fram í gegnum forritið Grindr, sem er stefnumótaforrit og að mestu notað af hinsegin fólki.

Samkvæmt skjáskotunum skiptust þeir á myndum og ræddu um kynlíf.

Í myndbandinu sem um ræðir sést maður ganga upp að Cacioppo, sem var klæddur í bol merktum PlayStation 5. Hann hafði unnið hjá Sony í rúm átta ár.

Myndatökumaðurinn kallaði Cacioppo „Jeff“ og spurði hvern hann ætlaði að hitta. Við það gekk Cacioppo inn í hús sitt og neitaði að svara spurningum myndatökumannsins sem öskraði þá að Cacioppo hefði mælt sér móts við fimmtán ára dreng og að hann ætlaði að hringja á lögregluna.

CNET leitaði svara hjá Sony vegna myndbandsins en miðlinum barst það svar að vitað væri af myndbandinu og að viðkomandi hefði verið rekinn.

PVP segir myndbandið og skjáskot hafa verið send til saksóknara í San Diego í Bandaríkjunum, þar sem Cacioppio býr, en þeir hafa ekki svarað fyrirspurnum. Í samtali við Kotaku segir talsmaður PVP að lögreglan starfi þó sjaldan með þeim og því þurfi að birta myndbönd og aðrar upplýsingar opinberlega.

„Þá tekur internetið við,“ sagði talsmaðurinn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.