Handbolti

Bara eitt mark eða minna á milli liðanna í sex af síðustu átta Hafnarfjarðarslögum

Óskar Ófeigur Jónsson skrifar
Það er alltaf vel tekist á í leikjum FH og Hauka eins og þessi mynd sýnir frá leik liðanna í fyrra.
Það er alltaf vel tekist á í leikjum FH og Hauka eins og þessi mynd sýnir frá leik liðanna í fyrra. Vísir/Hulda Margrét

Það er von á spennuleik í kvöld þegar FH-ingar taka á móti nágrönnum sínum í Haukum í elleftu umferð Olís deildar karla í handbolta.

Þetta er eini leikur kvöldsins í deildinni og um leið fyrsti leikurinn í umferðinni. Haukarnir eru að spila Evrópuleik um næstu helgi og leikurinn því færður fram. Þarna eru ekki bara erkifjendur og nágrannar að mætast heldur eru liðin einnig í tveimur efstu sætum Olís deildarinnar.

Ofan á þetta bætist síðan sú staðreynd að langflestir innbyrðis leikir Hafnarfjarðarliðanna undanfarin ár hafa verið mjög spennandi.

Leikurinn hefst klukkan 19.30 og verður sýndur beint á Stöð 2 Sport. Útsendingin hefst klukkan 19.15 en Seinni bylgjan verður með fulltrúa sína á leiknum og gera leikinn upp eftir hann.

FH vann eins marks sigur í eina leik liðanna á þessu tímabili til þessa en sá leikur var í sextán liða úrslitum Coca-Cola bikar keppninnar í haust. FH vann leikinn 27-26 og var það Gytis Smantauskas sem skoraði sigurmarkið. Haukarnir fengu sókn eftir það en tókst ekki að jafna.

Þetta er aðeins annar tveggja tapleikja Haukanna í leikjum á móti íslenskum liðum þennan veturinn.

Haukarnir unnu átta marka sigur í deildinni í fyrra en sá leikur sker sig mikið úr enda langstærsti sigurinn í leikjum liðanna undanfarin ár.

Sex leikir af síðustu átta hafa endaði með jafntefli eða með eins marks sigri. Sjöundi leikurinn vannst síðan með þremur mörkum.

Haukarnir hafa ekki náð að vinna í Kaplakrika í fimm síðustu deildar- og bikarleikjum sínum eða síðan þeir unnu 30-29 sigur 15. desember 2016.

FH-liðið hefur líka unnið fimm af síðustu tíu leikjum liðanna á báðum stöðum frá þeim tíma en Haukarnir eru aðeins með einn sigur á sama tíma. Hinir fjórir leikirnir hafa endað með jafntefli.

  • Síðustu Hafnarfjarðarslagir á Íslandsmóti og í bikarkeppni:
  • Bikar 9. september 2021: FH vann með einu marki (27-26) í Kaplakrika
  • Deild 15. maí 2021: Haukar unnu með 8 mörkum (34-26) á Ásvöllum
  • Deild 15. febrúar 2021: Jafntefli (29-29) í Kaplakrika
  • Deild 1. febrúar 2020: FH vann með 3 mörkum (31-28) í Kaplakrika
  • Deild 9. október 2019: Jafntefli (29-29) á Ásvöllum
  • Deild 10. desember 2018: Jafntefli (25-25) í Kaplakrika
  • Deild 12. september 2018: Jafntefli (29-29) á Ásvöllum
  • Deild 18. desember 2017: FH vann með 1 marki (30-29) í Kaplakrika



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.