Innlent

Risasamningur lokakaflinn í sögunni endalausu

Snorri Másson skrifar
Casa Christi, friðað en óvinsælt hús. Það mun líklega víkja fyrir nýbyggingu, sem mun kosta á þriðja milljarð króna. Hönnunarsamkeppni var síðast haldin árið 1996. Í baksýn er Gamli skóli, sem er frá 1846.
Casa Christi, friðað en óvinsælt hús. Það mun líklega víkja fyrir nýbyggingu, sem mun kosta á þriðja milljarð króna. Hönnunarsamkeppni var síðast haldin árið 1996. Í baksýn er Gamli skóli, sem er frá 1846. Vísir/Vilhelm

Menntamálaráðuneytið er að semja um rúmlega tveggja milljarða króna nýbyggingu á lóð Menntaskólans í Reykjavík, sem þýðir að senn ætti að hilla undir langþráðar framkvæmdir á lóð skólans. Deilt hefur verið um Cösu Christi áratugum saman, en nú kunna örlög hennar að vera ráðin.

Í millitíðinni er húsnæði svo knappt að kennt er í íþróttahúsinu, á kennarastofunni, á bókasafninu og raunar í hverju skúmaskoti í skólanum. 

Fréttastofa leit við í MR og kannaði aðstæður:

MR-ingar hafa setið kennslustundir í Cösu Christi áratugum saman. Húsið er orðið meira en 100 ára gamalt og það er orðið svolítið lúið og lengi hefur staðið til að rífa það. Allt hefur alltaf komið fyrir ekki.

Enn er þó óljóst hvað skal gert við elsta hluta byggingarinnar, sem er frá 1907. Hann er friðaður vegna aldurs og þarf því annaðhvort að standa áfram sem hluti af nýbyggingu eða vera færður á brott. Hvað sem því líður, er húsið í núverandi mynd á útleið.

„Nú erum við að klára verkkaupasamning við framkvæmdasýslu ríkisins. Ríkið hefur fjármagnað þessa framkvæmd og við erum núna vonandi að ganga frá þessu á allra næstu mánuðum,“ segir Lilja Alfreðsdóttir mennta- og menningarmálaráðherra.

2,5 milljarðar 

Málið hefur velkst um í kerfinu árum ef ekki áratugum saman og árið 2016 stóð sannarlega til að ráðast í framkvæmdir. Ekki varð af þeim. Sitjandi forsætisráðherra, Sigmundur Davíð Gunnlaugsson, talaði meðal annars gegn áformunum.

Svona gæti ný bygging litið út.MR

Nú er svo komið að bygging Casa Christi er orðin með öllu ónothæf - og þar sem ekki hefur fengist tímabundið leiguhúsnæði í vetur hefur annað húsnæði skólans verið gernýtt til kennslu á meðan, allt niður í íþróttahúsið og kennarastofuna. Nú er þó verið að semja um slíkt húsnæði.

Enn er óákveðið hvort og þá að hve miklu leyti verður stuðst við vinningstillögu frá árinu 1996 í fyrirhuguðum framkvæmdum. Kostnaðurinn á fimm ára framkvæmdatímabili er talinn munu nema um tveimur og hálfum milljarði króna.

Eitt er ljóst, að lífið verður allt annað fyrir MR-inga þegar risin er sú 2.620 fermetra nýbygging sem legið hefur á teikniborðinu alltof lengi.

„Við höfum mikinn metnað um að þetta húsnæði mæti þeim kröfum nútímalegt vísindalegt húsnæði. Þau fá loksins matsal jafnvel? Já, ég held það þetta verði aðeins betra en þegar við vorum hérna,“ segir Lilja.


Tengdar fréttir

Dyrum Cösu Christi lokað og MR-ingar fá inn í Dómkirkjunni

MR-ingar munu ekki nema í húsinu Casa Christi í vetur. Úttekt var gerð á húsinu og skýrslu um ástand þess skilað fyrir skólabyrjun í haust og varð þá ljóst að ekki sé boðlegt að kenna í húsinu. Nemendur þurfi því að leita yfir Lækjargötuna í von um kennslu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.