Körfubolti

Friðrik Ingi tekur við ÍR

Ingvi Þór Sæmundsson skrifar
Friðrik Ingi Rúnarsson er þrautreyndur þjálfari.
Friðrik Ingi Rúnarsson er þrautreyndur þjálfari. vísir/daníel

Friðrik Ingi Rúnarsson hefur verið ráðinn þjálfari karlaliðs ÍR í körfubolta. Hann tekur við liðinu af Borche Ilievski.

Friðrik Ingi er gríðarlega reyndur en þjálfaraferill hans spannar þrjá áratugi. Á síðasta tímabili var hann aðstoðarþjálfari Njarðvíkur. Síðasta aðalþjálfarastarf Friðriks Inga var með Þór Þ. tímabilið 2019-20.

Friðrik Ingi hefur þrisvar sinnum orðið Íslandsmeistari á þjálfaraferlinum og fjórum sinnum bikarmeistari. Þá þjálfaði hann karlalandsliðið um skeið og var framkvæmdastjóri KKÍ.

Fyrsti leikur ÍR undir stjórn Friðriks Inga er gegn Val á Hlíðarenda á fimmtudaginn. ÍR er í 10. sæti Subway-deildarinnar með tvö stig eftir fimm leiki.

Borche hætti með ÍR 22. október. Hann hafði stýrt liðinu frá 2015 með góðum árangri. Undir hans stjórn komust ÍR-ingar í úrslit um Íslandsmeistaratitilinn 2019.

ÍR er sjötta liðið sem Friðrik Ingi stýrir í efstu deild. Hann hefur einnig stýrt Njarðvík, KR, Grindavík, Keflavík og Þór Þ.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.