Handbolti

Gunnar Steinn vitnaði í Kára: Eina liðið þar sem þú elskar að sitja á bekknum

Óskar Ófeigur Jónsson skrifar
Gunnar Steinn Jónsson skorar fyrir íslenska landsliðið á HM.
Gunnar Steinn Jónsson skorar fyrir íslenska landsliðið á HM. Getty/ Jean Catuffe

Handboltamaðurinn Gunnar Steinn Jónsson ræddi um landsliðsferilinn sinn í nýja aukaþætti Seinni Bylgjunnar en hann var fyrsti gestur Stefáns Árna Pálssonar í Seinni Bylgjunni Extra.

Gunnar Steinn átti frábæran leik þegar Stjarnan vann Val í toppslag Olís deildar karla en hann var þá með sex mörk og níu stoðsendingar.

Stefán Árni vildi fá að vita hvernig Gunnar Steinn sér landsliðsferil sinn en hann á að baki 45 landsleiki fyrir Ísland.

„Það er kannski það sem maður er stoltastur af. Ég fékk að vera með í síðasta verkefni og var þá spurður hvort ég vildi gefa kost á mér. Mér fannst það ekki vera spurning við hæfi. Á öllum ferli var alltaf mitt efsta markmið að vera í landsliðinu,“ sagði Gunnar Steinn.

„Ég er mjög stoltur af þessum landsliðsferli og ég fékk að taka þátt í nokkrum stórmótum. Ég kom seint inn og óvænt, kom bakdyramegin inn. Þetta var frábær upplifun,“ sagði Gunnar Steinn.

„Í fyrsta landsleiknum þá spiluðum við í Álaborg á móti Noregi og þá sagði Kári Kristján við mig: Gunni, þetta er eina liðið þar sem þú elskar að sitja á bekknum. Það er alveg rétt hjá honum því það er allt annað að sitja á bekknum í landsliðinu heldur en í félagsliði,“ sagði Gunnar Steinn.

Það má heyra þetta viðtalsbrot úr Seinni Bylgjunni Extra hér fyrir neðan.




Fleiri fréttir

Sjá meira


×