Dagur er risinn í Garðabænum

Stjarnan hefur farið vel af stað í Olís-deildinni og unnið alla fjóra leiki sína. Þetta er besta byrjun Stjörnunnar á Íslandsmóti í manna minnum.

Einn af lykilmönnunum í þessari góðu byrjun Stjörnunnar er Dagur. Hann hefur skorað tuttugu mörk í fyrstu fjórum leikjum Stjörnunnar og það í aðeins 22 skotum. Það gera 5,0 mörk að meðaltali í leik og 90,9 prósent skotnýtingu.

Það er mikil bæting frá því á síðasta tímabili þegar Dagur var með 3,1 mark að meðaltali í leik og 70,2 prósent skotnýtingu.

Dagur er með 92,3 prósent nýtingu úr hornafærum. Það er það besta í deildinni hjá leikmönnum sem spila alla jafna í horni fyrir utan Gróttumanninn Andra Þór Helgason sem hefur nýtt öll hornafærin sín.

Dagur hefur einnig bætt varnarleikinn frá síðasta tímabili. Hann er með 1,3 löglegar stöðvanir að meðaltali í leik samanborið við 0,7 á síðasta tímabili. Þá er hann með 1,8 stolna bolta að meðaltali í leik sem er það mesta í deildinni. Á síðasta tímabili var Dagur með 0,7 stolna bolta að meðaltali í leik.

Hinn 21 árs Dagur gekk í raðir Stjörnunnar frá KA í fyrra. Hann hafði þá verið í lykilhlutverki hjá KA í þrjú tímabil, eitt í næstefstu deild og tvö í Olís-deildinni.

Dagur hefur spilað með öllum yngri landsliðunum og var hluti af íslenska liðinu sem vann silfur á EM U-18 ára 2018. Dagur var þá valinn í úrvalslið mótsins.

Auk þess að hafa spilað vel í Olís-deildinni skoraði Dagur samtals tólf mörk í tveimur leikjum í Coca Cola-bikarnum sem kláraðist fyrr í þessum mánuði.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði.