Fótbolti

Evra opnar sig varðandi kyn­ferðis­of­beldi sem hann varð fyrir sem táningur

Runólfur Trausti Þórhallsson skrifar
Patrice Evra hefur opnað sig varðandi skelfilegan atburð sem átti sér stað þegar hann var 13 ára gamall.
Patrice Evra hefur opnað sig varðandi skelfilegan atburð sem átti sér stað þegar hann var 13 ára gamall. John Peters/Getty Images

Patrice Evra, fyrrum leikmaður Manchester United og franska landsliðsins, hefur stigið fram og opnað sig varðandi kynferðisofbeldi sem hann varð fyrir þegar hann var aðeins 13 ára gamall.

„I love this game“ eða „Ég elska þennan leik“ hefur verið orðatiltæki það orðatiltæki sem Patrice Evra hefur gert að einkennisorðum sínum á undanförnum árum. Er það einnig heiti ævisögu Evra sem kemur út á næstunni. Í bókinni er farið yfir hvað hefur drifið á daga hins fertuga Evra bæði innan vallar sem utan.

Þar opnar Evra sig varðandi atvik sem gerðist er hann var 13 ára gamall. Atvik sem hann hafði aldrei sagt neinum frá fyrr en nýverið. Frá þessu er greint á vef The Times þar sem farið er yfir valda kafla í bókinni.

Aðeins 13 ára gamall var Evra beittur kynferðisofbeldi af kennara sínum. Hélt hann því leyndu allt þangað til hann hóf að skrifa bókina sína. Hann sagði engum frá en hefur nú ákveðið að stíga fram í þeirri von um að hjálpa öðrum í sömu stöðu.

„Ég sagði engum frá, ég skammaðist mín of mikið til að segja móður minni og var ekki viss um að neinn annar myndi trúa mér. Þangað til nú hef ég hef aldrei sagt neinum alla söguna. Ég vil hjápa krökkum þarna úti finni hugrekkið til að stíga fram og sjá til þess að þau kenni ekki sjálfum sér um eins og ég gerði.“

„Þetta er erfitt augnablik fyrir mig. Ég á bræður, systur og nána vini sem vita ekki af þessu. Ég þarf að segja þeim þetta nú,“ segir Evra í bók sinni.

Er Evra var að hefja feril sinn fyrir alvöru hafði lögreglan samband við hann þar sem hún hafði fengið kvartanir á sitt borð varðandi téðan kennara. Evra sagði hins vegar ekkert við lögregluna um hvað hafði gerst er hann var 13 ára gamall. Eitthvað sem hann hefur séð eftir allar götur síðan.

„Ég er ekki feiminn við að segja að mér hefur liðið eins og hugleysingja í mörg ár þar sem ég hef aldrei stigið fram og sagt neitt. Ég er samt ekki að gera það loks núna fyrir mig heldur fyrir öll þau börn sem hafa gengið í gegnum sömu lífsreynslu og ég.“

„Ég sé eftir því að hafa ekki stigið fram fyrr þar sem ég hefði getað hjálpað svo mörgum. Ég hef fengið nóg af þessari eitruðu karlmennsku. Í augum föður míns var það veikleiki að gráta, en það að gráta er ekki sama sem merki þess að vera veiklunda,“ sagði Evra að endingu.

Patrice Evra er litríkur karakter og eflaust verður bókin í sama stíl. Þessi 40 ára gamli Frakki sem á ættir að rekja til Senegal átti magnaðan feril þar sem hann spilaði 81 A-landsleik fyrir Frakkland og bar um tíma fyrirliðabandið. 

Það gerði hann einnig hjá Manchester United þar sem hann vann til fjölda verðlauna áður en hann færði sig um set til Juventus þar sem hann gerði slíkt hið sama.

Patrice Evra ásamt Sir Alex Ferguson, Usain Bolt og Khabib Nurmagomedov fyrir leik hjá Manchester United fyrr í þessum mánuði.Ash Donelon/Getty Images



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.