Innlent

Full aflétting eftir fjórar vikur en grímuskyldu aflétt á miðnætti

Hallgerður Kolbrún E. Jónsdóttir skrifar
FJöldatakmarkanir fara úr 500 upp í 2000 manns á miðnætti, grímuskyldu verður aflétt og opnunartímar á skemmtistöðum lengdur um klukkustund. 
FJöldatakmarkanir fara úr 500 upp í 2000 manns á miðnætti, grímuskyldu verður aflétt og opnunartímar á skemmtistöðum lengdur um klukkustund.  Vísir/Vilhelm

Tvö þúsund fá að koma saman, grímuskyldu verður aflétt og opnunartími lengist um klukkutíma á skemmtistöðum á miðnætti í kvöld. Aflétting verður gerð í tveimur skrefum, fyrst núna á miðnætti og svo eftir fjórar vikur. 

Þetta tilkynnti Svandís Svavarsdóttir að loknum ríkisstjórnarfundi í ráðherrabústaðnum í morgun. Minnisblað Þórólfs Guðnasonar sóttvarnalæknis, sem sjá má í tengdum skjölum hér að neðan, var þar meðal annars til umræðu. 

Lagði hann í minnisblaðinu fram þrjá möguleika varðandi framhaldið; 1. að viðhafa áfram sömu takmarkanir, 2. að slaka á í skrefum og 3. að aflétta öllum takmörkunum. 

Í minnisblaði, sem forsætisráðherra og heilbrigðisráðherra sendu sóttvarnalækni áður en hann sendi frá sér minnisblað sitt, bentu ráðherrarnir á að stjórnvöld á hinum Norðurlöndunum hefðu rökstutt ákvörðun sína um að hætta öllum aðgerðum með þeim rökum að ólíklegt væri að faraldur kórónuveirunnar í vel bólusettu samfélagi ógnaði því í heild. 

Svandís segist gera ráð fyrir að öllu óbreyttu og ef allt gengur vel að um fulla afléttingu verði að ræða eftir fjórar vikur. 

Lærum af reynslunni og afléttum í skrefum

„Það sem ég legg til eða hef tekið ákvörðun um er full aflétting í tveimur skrefum. Fyrra skrefið er tekið núna á miðnætti og það seinna eftir fjórar vikur. Nú á miðnætti eru þær breytingar helstar að almenn fjöldatakmörkun fer úr 500 upp í 2.000, grímuskyldu er aflétt og opnunartíminn lengist um klukkutíma á skemmtistöðum,“ sagði Svandís að loknum ríkisstjórnarfundi. 

„Svo gerum við ráð fyrir, að öllu óbreyttu ef allt gengur vel og með þessum fyrirvörum sem við þekkjum orðið mjög vel, að um fulla afléttingu verði að ræða eftir fjórar vikur.“

Aðspurð hvort það hefði komið til fullra afléttinga núna ef ekki væri fyrir stöðuna á Landspítalanum segir Svandís það ekki endilega vera svo. 

„Nei, það er ég nú ekki viss um. Það er nú eitt af því sem við verðum að gera það er að læra af reynslunni og við höfum verið að aflétta í skrefum í þessum faraldi, nema 1. júlí þegar við tókum þetta stóra skref og við erum enn að bíta úr nálinni með það. Ég held að það sé skynsamlegt að gera þetta svona og þetta er nánast full aflétting og lítið sem stendur út af núna,“ segir Svandís. 

Hún segist hafa farið að mestu eftir tillögum Þórólfs um afléttingar. Ríkisstjórnin hafi að mestu verið á sama máli í þessum efnum. 

„Það endar alltaf með því að ríkisstjórnin er sammála en eins og við vitum eru deildar meiningar og hafa verið allan tímann.“

Tilkynning heilbrigðisráðuneytisins

Almennar fjöldatakmarkanir verða 2.000 manns, grímuskyldu verður aflétt, opnunartími veitingastaða lengdur um klukkustund og skráningarskyldu gesta aflétt. Regla um nándarmörk verður áfram 1 metri. Þetta er megininntak breytinga á reglugerð um samkomutakmarkanir sem tekur gildi 20. október samkvæmt ákvörðun heilbrigðisráðherra. Stefnt er að fullri afléttingu samkomutakmarkana innanlands frá og með 18. nóvember.

Heilbrigðisráðherra kynnti áformaðar breytingar á fundi ríkisstjórnar í morgun. Byggt er á meðfylgjandi minnisblaði sóttvarnalæknis til heilbrigðisráðherra þar sem tilgreindir eru þrír valkostir afléttinga á sóttvarnaráðstöfunum innanlands, þ.e. full aflétting allra sóttvarnaaðgerða, aflétting að hluta eða óbreyttar aðgerðir.

Breytingar frá og með 20. október:

Almennar fjöldatakmarkanir 2.000 manns í stað 500.

Nándarregla óbreytt 1 metri, með sömu undantekningum og verið hafa.

Með notkun hraðprófa má víkja frá fjöldatakmörkunum og nándarreglu.

Grímuskyldu aflétt að frátöldum sérstökum reglum á heilbrigðisstofnunum.

Skráningarskyldu á viðburðum og veitingahúsum aflétt.

Opnunartími veitingastaða þar sem heimilaðar eru áfengisveitingar lengdur um klukkustund, til kl. 01:00. Rýma þarf staði fyrir kl. 02:00.

Full aflétting áformuð 18. nóvember

Stefnt er að fullri afléttingu allra samkomutakmarkana innanlands frá og með 18. nóvember, með fyrirvara um að faraldurinn þróist ekki verulega á verri veg, svo sem vegna mikillar fjölgunar innlagna á spítala vegna COVID-19 sem heilbrigðiskerfið ræður ekki við. Áfram verði beitt sýnatöku, einangrun, smitrakningu og sóttkví en þessi atriði verði þó endurskoðuð í samráði við sóttvarnalækni.

Forsendur breytinga

Í minnisblaði forsætisráðherra og heilbrigðisráðherra til ríkisstjórnar, dags. 12. október 2021, var reifuð framkvæmd svokallaðrar temprunarleiðar og horfur framundan í faraldrinum. Þar kom meðal annars fram að leið temprunar, sem farin hefur verið í þessari bylgju faraldursins, ætti ekki að standa lengur en í takmarkaðan tíma nema alvarlegar breytingar yrðu á eðli faraldursins. Þegar öllum takmörkunum var aflétt í sumar fjölgaði smitum umtalsvert og álag á heilbrigðiskerfið jókst. Síðan hefur bólusetningarstaða hér á landi styrkst, m.a. með bólusetningu barna 12 til 15 ára, örvunarskammti fyrir viðkvæma hópa og viðbótarskammti fyrir einstaklinga sem fengu bóluefni Janssen. Þá sýndi sig að ráðstafanir sem gripið var til 25. júlí sl. með 200 manna fjöldatakmörkunum, nálægðartakmörkunum, grímuskyldu og takmörkuðum opnunartíma veitingastaða gáfust vel til að tempra útbreiðslu smita. Hægfara afléttingar þessara takmarkana hafa ekki enn valdið auknum innlögnum á spítala þótt fjöldi smita sé nokkuð stöðugur, eins og rakið er í minnisblaði sóttvarnalæknis. Stór hluti smitanna er meðal barna sem þurfa miklu síður á innlögn að halda vegna COVID 19.

Ráðherra og sóttvarnayfirvöldum er samkvæmt sóttvarnalögum skylt að leitast í sífellu við að aflétta gildandi sóttvarnaráðstöfunum í samræmi við þróun faraldursins og breytt hættumat eftir því sem ónæmi eflist í samfélaginu. Byggt skal á viðurkenndri læknisfræðilegri þekkingu á smitsjúkdómum og faraldsfræði þeirra. Til að aðgerðir nái ávallt þeim árangri sem að er stefnt, og gangi ekki lengra en þörf er á skal ávallt byggt á nýjustu þekkingu á þeim smitsjúkdómum sem við er að fást hverju sinni. Á þessu byggjast þær ákvarðanir ráðherra um breytingar á sóttvarnaráðstöfunum sem hér hafa verið raktar.

Fréttin hefur verið uppfærð. 

Tengd skjöl


Tengdar fréttir

Segir tíma til kominn að skila frelsinu aftur til fólksins

Vara­for­maður Sjálf­stæðis­flokksins og frá­farandi ráð­herra segir tíma­bært að af­létta þeim tak­mörkunum sem lands­menn hafa þurft að sæta síðast­liðið eitt og hálft ár vegna Co­vid. Sótt­varna­læknir segist senni­lega munu skila minnis­blaði til ráð­herra á mánu­dag.

Allar forsendur fyrir tilslökunum í næstu viku

Þórólfur Guðnason sóttvarnalæknir segir allar forsendur til staðar til að halda áfram í tilslökunum hér á landi. Hann fundaði með stjórnendum Landspítalans í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×