Teitur fjórði íslenski reddarinn hjá Flensburg

Hægri skytturnar Magnus Rød og Franz Semper eru meiddar og Flensburg fékk Teit til að fylla þeirra skarð. Teitur kom til Flensburg frá Kristianstad í Svíþjóð sem hann lék með í þrjú ár.

Teitur er fjórði Íslendingurinn sem Flensburg hóar í til að „redda“ liðinu í vandræðum.

Árið 2006 fékk Flensburg Viggó Sigurðsson til að taka tímabundið við liðinu vegna veikinda Kent-Harrys Andersson. Viggó stýrði Flensburg frá júlí og fram í desember 2006. Viggó náði stórgóðum árangri með Flensburg og þegar hann sagði skilið við liðið var það í 2. sæti þýsku úrvalsdeildarinnar og komið í átta liða úrslit Meistaradeildar Evrópu.

Í nóvember 2012 vantaði Flensburg rétthentan útileikmann eftir að Arnór Atlason sleit hásin. Forráðamenn Flensburg horfðu þá til Íslands, nánar tiltekið til Hafnarfjarðar og sömdu við Ólaf Gústafsson til loka tímabilsins.

Ólafur lék með Flensburg til 2014. Síðasti leikur hans fyrir Flensburg var gegn Kiel í úrslitum Meistaradeildarinnar. Flensburg vann tveggja marka sigur, 30-28, og varð þar með Evrópumeistari í fyrsta sinn í sögu félagsins.

Í janúar á þessu ári var Flensburg einu sinni sem oftar í vandræðum vegna meiðsla hægri skyttna sinna. Liðið fékk þá Alexander Petersson frá Rhein-Neckar Löwen til að fylla skarð áðurnefnds Sempers sem sleit krossband í lok nóvember. 

Alexander lék fimmtán deildarleiki með Flensburg og skoraði tíu mörk. Hann þekkti ágætlega til hjá Flensburg eftir að hafa leikið með liðinu á árunum 2007-10. Eftir síðasta tímabil gekk Alexander í raðir Melsungen.

Að öllu óbreyttu leikur Teitur sinn fyrsta leik í treyju Flensburg þegar liðið sækir Veszprém heim í B-riðli Meistaradeildarinnar í dag. Næsti leikur Flensburg í þýsku úrvalsdeildinni er gegn Stuttgart á sunnudaginn.