Fylkir vann Kórdrengi í framlengingu

Lið Fylkis, sem samanstendur að mestu úr hópi 7AM sem lék í fyrstu deildinni á síðasta tímabili, sat hjá í fyrstu umferð og leikur því tvisvar í þessari viku. Kórdrengir komu einnig upp úr fyrstu deild á tímabilinu og því var mikil eftirvænting eftir leik þessara liða sem háðu harða baráttu núna í vor. Kórdrengir létu í lægra haldi fyrir XY í síðasta leik eftir frábæran fyrri hálfleik og því spennandi að sjá hvort þeim tækist að loka þessum leik gegn Fylki.

Leikið var í Inferno kortinu sem bæði lið hafa spilað mikið í, en Fylkir vann hnífalotuna og byrjaði því í vörn (Counter-Terrorists). Kortið þykir henta þeirri hlið betur en leikurinn var gríðarlega jafn í upphafi. Zerq fór heldur betur vel af stað fyrir Fylkismenn og felldi þrjá Kórdrengi strax í upphafi fyrstu lotu, en svo skiptust liðin á að hafa betur framan af. Þá tókst Fylki að setja pressu á Kórdrengi og senda þá í spar. Zerq hélt áfram að gera vel og skapa rými með því að fella Kórdrengi snemma í lotum með vappanum og munaði miklu á fellufjölda liðanna þegar leið á hálfleikinn. Fylkismenn gerðu vel í að lifa lotur af og ná þannig forskoti.

Staða í hálfleik: Kórdrengir 5 - 10 Fylkir

Liðin skiptu þá um stöður og breyttist staðan eftir því. Snky, sem hafði verið upp og ofan í fyrri hálfleik hrökk í gang og tryggði Kórdrengjum lotur hvað eftir annað. Kórdrengir skelltu einfaldlega í lás og náðu ekki bara að jafna heldur komast yfir. Það háði þeim þó að vera nokkuð til baka og sækja sér ekki miklar upplýsingar. Fylkismenn komust því upp á lagið með sækja á B-svæðið sem Blazter og Demantur vörðu og illa gekk fyrir aðra Kórdrengi að koma þeim til hjálpar. Leikurinn var því í járnum fram á þrítugustu lotu þegar varamaður Kórdrengja náði að klemma síðustu lotuna með miklum tilþrifum á síðustu sekúndu og senda leikinn í framlengingu.

Staða eftir venjulegan leiktíma: Kórdrengir 15- 15 Fylkir

Fyrsta lotan í framlengingu hefði átt að falla með Kórdrengjum en Zerq tókst með ótrúlegum herkjum að hafa betur í lokaeinvíginu og koma Fylkismönnum yfir. Ekki tókst Kórdrengjum að stoppa upp í götin í framlengingunni og gátu Fylkismenn því nýtt sér meðbyrinn, haldið uppteknum hætti og sótt örugglega á veikt B-svæðið.

Lokastaða Kórdrengir 16 - 19 Fylkir

Kórdrengir hafa staðið sig vel en nú reynir á að hafa úthald til að klára leiki. Í næstu viku leika nýliðarnir gegn kempunum í Dusty. Fylkismenn eiga síðan leik á föstudaginn gegn Þór og gæti það reynst ansi brött brekka, enda valtaði Þór 16-3 yfir Vallea í síðustu viku. Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.