Banda­ríkja­menn og Tali­banar funda um brott­flutning og kven­réttindi

Fundað verður í Doha í Katar, en þetta er í fyrsta sinn sem aðilarnir setjast niður til að reyna að ná saman um þessi mál.

Talsmaður Talibana, sem staðsettur er í Doha, sagði í samtali við fréttastofu AP í dag að einnig yrði fjallað um friðarsamkomulagið við bandarísk stjórnvöld frá síðasta ári.

Þar var kveðið á um brotthvarf bandaríska heraflans frá Afganistan, meðal annars að Talibanar skyldu hleypa útlendingum og innlendu samstarfsfólki erlendra aðila óhindrað úr landi.

Er búist við því að bandaríska sendinefndin muni þrýsta á um að Talibanar virði þau fyrirheit, sem og að réttindi kvenna og stúlkna til náms og starfa verði virt, og að alþjóðlega hjálparstofnanir fái að starfa á svæðum þar sem fólk á um sárt að binda vegna skorts á mat og öðrum nauðsynjum.

Heimildarmaður AP úr ranni Bandaríkjastjórnar lagði áherslu á að í viðræðunum fælist ekki viðurkenning á Talibönum sem lögmætum stjórnvöldum í Afganistan.