Viðskipti innlent

Ís­lendingar í Pan­dóru­skjölunum: Icelandair, vatns­verk­smiðja, að­stoðar­for­stjóri Kviku og hýsing ný­nasista­á­róðurs

Eiður Þór Árnason skrifar
Fjallað er um málið í Stundinni í dag. Mörg félaganna eru skráð á Tortóla.
Fjallað er um málið í Stundinni í dag. Mörg félaganna eru skráð á Tortóla. Samsett

Vatnsverksmiðja í Þorlákshöfn, flugvélaviðskipti Icelandair á Tortóla, aðstoðarforstjóri Kviku og hýsing nýnasistaáróðurs er meðal þess sem kemur við sögu í Pandóruskjölunum.

Í nýjasta tölublaði Stundarinnar eru birtar upplýsingar um þá Íslendinga sem fram koma í skjölunum en Stundin og Reykjavík Media hafa aðgang að gögnunum. Gagnalekinn samanstendur af 11,9 milljónum skjala frá fyrirtækjum sem sérhæfa sig í að setja upp aflandsfélög og aflandssjóði.

Keyptu flugvélar í gegnum Tortóla

Nafn fyrirtækis í eigu Icelandair kemur fyrir í Pandóruskjölunum en félagið sem var skráð í skattaskjólinu Tortóla keypti þrjár Boeing 737-þotur með lánum frá Íslandsbanka og síðar Glitni.

Tortólafélagið Barkham Associates S.A var í eigu IG Invest ehf., dótturfélags Icelandair, sem var hluti af rekstri flugvélaleigunnar Icelease ehf. Lánið til flugvélakaupanna var veitt árið 2004 og hefur félagið meðal annars leigt þoturnar til Air Baltic, Aerosvit Airlines og Ukraine International Airlines.

Icelandair gafst ekki ráðrúm til að svara öllum spurningum Stundarinnar fyrir prentun vegna þess hve langt málið nær aftur. Bogi Nils Bogason, núverandi forstjóri Icelandair, segir þó í svörum til blaðsins að flugfélagið sé á móti því að fyrirtæki nýti sér lágskattasvæði til að koma í veg fyrir skattgreiðslur. 

Bogi Nils Bogason, forstjóri Icelandair, segir að félagið sé á móti notkun lágskattasvæða til að koma í veg fyrir skattgreiðslur.Vísir/Vilhelm

Áður hefur verið fjallað um félög í eigu Icelandair á lágskattasvæðunum Guernsey og Bermúna. Bogi segir að afkoma þeirra félaganna sé talin fram á Íslandi og skattar greiddir hér á landi.

Árétta skal að það er ekki ólöglegt að eiga og nota félög í skattaskjólum. Það sem skiptir máli er hvernig skattgreiðslum sem snerta slík félög og eigendur þeirra er háttað.

Skráður stjórnandi umdeilds vefhýsingarfyrirtækis

Fram kemur í umfjöllun Stundarinnar að Íslendingurinn Aðalsteinn Pétur Karlsson hafi verið skráður stjórnandi Seychelles-eyjafyrirtækisins IceNetworks Ltd. sem á og rekur umdeilt vefhýsingarfyrirtæki. 

Þetta má lesa úr Pandóruskjölunum en nafnlaust níðklám, áróður nýnasista, sala stera, sterkra verkjalyfja og annarra lyfseðilsskyldra lyfja er meðal þess efnis sem er sagt vera hýst er í gegnum fyrirtækið Orangewebsite.

Í kynningarefni sínu leggur hýsingafyrirtækið áherslu á að það hýsi efni án þess að vita hver viðskiptavinurinn er og það leggi sig fram við að tryggja að hann verði „ekki fyrir ritskoðun eða áreiti einhvers sem er ekki sammála þér.“

Stundin greindi frá því árið 2017 að Orangewebsite hafi hýst bandarísku nýnasistasíðuna The Daily Stormer og Norðurvígi, sem Íslandsdeild nýnasistahópsins „Norrænu mótstöðuhreyfingarinnar“ heldur úti.

Fjármálaeftirlitið sektaði Kviku vegna hagsmunaárekstra

Ármann Þorvaldsson, aðstoðarforstjóri Kviku, átti að minnsta kosti tvö félög í skattaskjólum sem koma fram í Pandóruskjölunum. Gögnin sýna einnig viðskipti bresks félags sem hann stofnaði sem Fjármálaeftirlitið hefur sektað Kviku fyrir að stunda viðskipti við vegna hagsmunaárekstra tengdum Ármanni og breska félaginu.

Ármann Þorvaldsson, aðstoðarforstjóri Kviku.Kvika

Ármann, segir í svörum til Stundarinnar, að hann hafi stofnað bæði félögin um og eftir 2010. Hann hafi ekki hafa átt neina hluti í félögunum þegar hann hóf störf hjá Kviku og greitt alla skatta og gjöld sem honum hafi borið að gera.

Hafnar því að hafa fjármagnað Kona fór í stríð með aflandsfé

Einnig kemur fram í umfjöllun Stundarinnar að Pandóruskjölin sýni hvernig Serhiy Lavrenyuk, úkraínskur meðframleiðandi íslensku kvikmyndarinnar Kona fer í stríð, hafi sótt í aflandssjóð til að fjármagna verkefni sín. 

Framleiðandinn fullyrðir þó að þeir peningar hafi ekki verið notaðir við gerð myndarinnar. Þá eru engar vísbendingar eru um að lög hafi verið brotin við fjármögnun hennar.

Eignarhald vatnsverksmiðju í Tortóla

Eignarhaldið á vatnsverksmiðjunni Icelandic Glacial í Ölfusi, sem Jón Ólafsson fjárfestir hefur byggt, er í gegnum félag á Tortóla sem sonur hans Friðrik Ólafsson er skráður fyrir. Þetta má lesa úr Pandóruskjölunum.

Gögnin eru sögð sýna umtalsverð umsvif Jóns og fjölskyldu hans við skattaskjólið Tortóla en slík tengsl Jóns hafa áður komið fram í fjölmiðlum. Að sögn Stundarinnar sýna Pandóruskjölin ekki fram á neitt misjafnt varðandi skattgreiðslur fjölskyldunnar og hefur Jón sjálfur sagt að hann hafi ekkert að fela fyrir skattayfirvöldum.

Umrætt Tortólafélag heitir Barak Investment Ltd. og var stofnað árið 2011. Jón segir í svörum til Stundarinnar að unnið sé að því að leggja félagið niður og að eignarhald vatnsátöppunarverksmiðjunnar verði hér eftir verða í Hong Kong þar sem Jón er búsettur.

Nánar er fjallað um Íslendinga í Pandóruskjölunum í nýjasta tölublaði Stundarinnar.


Tengdar fréttir

Vill að blaðamennirnir láti allt flakka

Kristinn Hrafnsson, ritstjóri Wikileaks, er mótfallinn þeirri aðferðafræði aðstandenda Pandora-skjalanna svokölluðu að birta ekki öll gögn lekans eins og þau leggja sig. Í staðinn fær almenningur upplýsingarnar í smáskömmtum í ólíkum fjölmiðlum, eftir því sem þeir vinna úr þeim.

Boða rann­sóknir vegna Pan­dóru­skjalanna

Yfir­völd í að minnsta kosti átta löndum víða um heim hafa til­kynnt að þau muni koma til með hefja rann­sókn vegna upp­lýsinga í Pan­dóru­skjölunum svo­kölluðu sem birt voru í gær.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×