Körfubolti

Liðsfélagar í WNBA deildinni í körfubolta slógust út á götu

Óskar Ófeigur Jónsson skrifar
Crystal Bradford í leik með Atlanta Dream liðinu á tímabilinu.
Crystal Bradford í leik með Atlanta Dream liðinu á tímabilinu. Getty/ Jevone Moore

Tveir leikmenn Atlanta Dream liðsins í WNBA-deildinni í körfubolta fá ekki að spila áfram hjá félaginu á næstu leiktíð. Ástæðan er að myndband með þeim í slagsmálum fyrr á árinu komst á flug á netinu.

Leikmennirnir eru Courtney Williams og Crystal Bradford. Það sem hefur kallað á gagnrýni á forráðamenn Atlanta Dream í þessu máli er að félagið vissi af atvikinu sem gerðist í maí en aðhafðist ekkert á meðan tímabilinu stóð.

Þær Williams og Bradford kláruðu því tímabilið með Dream liðinu eins og ekkert hefði komið upp á.

Williams var besti leikmaður liðsins og var efst hjá því í stigum (16,5 í leik), fráköstum (6,8) og stoðsendingum (4,0) á leiktíðinni en Bradford var í fínu hlutverki með 8,8 stig og 3,8 fráköst í leik. Bradford kláraði þó ekki tímabilið því hún meiddist í ágúst.

Þegar myndband af slagsmálunum, sem urðu út á götu fyrir framan matarvagn nærri skemmtistað í miðborg Atlanta, fór að vekja athygli á netinu, þá ákváðu yfirmenn félagsins að hvorugur leikmaðurinn fengi að spila hjá Dream á næstu leiktíð.

Marcus Crenshaw, umboðsmaður leikmannanna, sagði að félagið hefði ekki refsað leikmönnunum á sínum tíma þrátt fyrir að hafa vitað af slagsmálunum.

Hann telur að félagið skammist sín fyrir atvikið og vilji því losa sig við báða leikmennina. Bæði Atlanta Dream og WNBA deildin segja að málið sé enn í rannsókn.

NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.