Messi verður líklega með PSG þegar liðið mætir City

Hjörtur Leó Guðjónsson skrifar 27. september 2021 18:01

Lionel Messi var í fullu fjöri á æfingasvæði Parísarliðsins í morgun. Aurelien Meunier - PSG/PSG via Getty Images

Lionel Messi, sóknarmaður franska knattspyrnufélagsins Paris Saint-Germain og einn besti knattspyrnumaður heims, verður að öllum líkindum klár í slagin þegar að franska stórveldið mætir Englandsmeisturum Manchester City í riðlakeppni Meistaradeildar Evrópu á morgun.

Þetta staðfesti Mauricio Pochettino, þjálfari PSG, á blaðamannafundi fyrr í dag. Messi kom ekkert við sögu í seinustu tveim deildarleikjum liðsins eftir að hann meiddist á hné í leik gegn Lyon á dögunum.

„Hann [Messi] er í góðum málum,“ sagði Pochettino. „Ég held að hann verði í hópnum, en ég er ekki búinn að ákveða byrjunarliðið.“

Þjálfari City, Pep Guardiola, vonast til að hans fyrrum leikmaður nái leiknum á morgun, en Messi lék um tíma undir stjórn Guardiola hjá Barcelona. Messi er sá leikmaður sem hefur skorað flest mörk í Meistaradeildinni gegn liðum undir stjórn Guardiola, eða sex talsins, en hann á þó enn eftir að skora sitt fyrsta mark fyrir Parísarliðið.

„Við höfum verið heppin að fá að fylgjast með þessum leikmanni í 16 ár,“ sagði Guardiola. „Það sem hann hefur gert er meira en stórkostlegt og fyrir leikinn vona ég að hann geti spilað á morgun.“

Leikur PSG og Manchester City verður sýndur í beinni útsendingu á Stöð 2 Sport 2 á morgun, en útsendingin hefst klukkan 18:50.

Meistaradeild Evrópu er á Stöð 2 Sport en upplýsingar um útsendingar má finna hér. Meistaradeildin er hluti af Stöð 2 Sport erlent sem kostar 3.990 krónur á mánuði.

Fótbolti Meistaradeild Evrópu