Stefán Vagn Stefánsson er formaður flóttamannanefndar.Stöð 2
Flóttamannanefnd hyggst að öllum líkindum skila minnisblaði með tillögum sínum varðandi móttöku flóttamanna frá Afganistan til Ásmundar Einars Daðasonar, félags- og barnamálaráðherra, í dag.
Morgunblaðið hefur þetta eftir Diljá Mist Einarsdóttur, aðstoðarmanni utanríkisráðherra og einum nefndarmanna. Upphaflega stóð til að skila minnisblaðinu til ráðherra fyrir helgi, en töf varð á.
Haft er eftir Diljá Mist að hún geri ráð fyrir að félagsmálaráðherra muni svo leggja minnisblaðið fyrir ríkisstjórn á morgun, þriðjudag.
Flóttamannanefnd var kölluð saman í síðustu viku vegna þess ástands sem uppi er í Afganistan eftir að talibanar lögðu undir sér höfuðborgina Kabúl og svo gott sem landið allt, og var henni falið að gera tillögur til stjórnvalda um hvernig taka megi á móti flóttamönnum frá landinu.
Búist er við miklum fólksflutningum frá landinu á næstu misserum vegna uppgangs Talibana.
Flóttamannanefnd mun skila inn tillögum til ráðherra um hvernig taka megi á móti flóttamönnum frá Afganistan fyrir ríkisstjórnarfund næsta þriðjudag. Verið sé að vinna tillögurnar mun hraðar en almennt væri gert vegna alvarleika stöðunnar.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
