Kepa kom inn fyrir vítakeppnina og tryggði Chelsea Ofurbikarinn

Valur Páll Eiríksson skrifar
Kepa Arrizabalaga varði tvær spyrnur í vítakeppni kvöldsins.
Kepa Arrizabalaga varði tvær spyrnur í vítakeppni kvöldsins. Darren Walsh/Chelsea FC via Getty Images

Chelsea eru ríkjandi Meistaradeildarmeistarar eftir sigur á Manchester City í úrslitum keppninnar í vor en Villarreal fögnuðu sigri í Evrópudeildinni eftir sigur á nágrönnum þeirra, Manchester United, í úrslitum.

Chelsea þóttu ef til líklegri aðilinn fyrir leik kvöldsins en leikurinn var í járnum framan af. Það voru þó þeir bláklæddu sem komust í forystu á 27. mínútu með marki Marokkómannsins Hakim Ziyech. Hann afgreiddi boltann úr teignum eftir laglega sókn upp vinstri kantinn sem lauk með fyrirgjöf Þjóðverjans Kai Havertz á Ziyech.

1-0 stóð í hléi en þeir spænsku höfðu ógnað undir lok hálfleiksins þar sem þeir áttu meðal annars tilraun í slá.

Markramminn stríddi Villarreal áfram í síðari hálfleiknum en framherjinn Gerard Moreno átti stangarskot snemma í hálfleiknum. Villarreal voru töluvert hættulegri aðilinn í seinni hálfleiknum og Moreno tókst loks að finna netmöskvana. Hann átti þá góðan samleik við Boulaye Dia áður en hann afgreiddi boltann frábærlega upp í samskeytin fjær. Staðan því orðin 1-1.

Hvorugt liðanna náði að setja annað mark á leikinn áður en lokaflautið gall og því fór leikurinn 1-1. Framlenging tók þá við.

Framlengingin var einkar tilþrifalítil þar sem fátt var um færi. Ljóst var nánast frá upphafi hennar til enda að vítaspyrnukeppni væri fram undan. Thomas Tuchel, stjóri Chelsea, tók áhugaverða ákvörðun er hann skipti markverði sínum Edouard Mendy af velli fyrir Kepa Arrizabalaga rétt fyrir vítakeppnina.

Bæði lið skoruðu þar úr fjórum spyrnum af fimm þar sem Kepa og Sergio Asenjo, markvörður Villarreal, vörðu eina spyrnu hvor. Asenjo varði fyrstu spyrnu Chelsea frá Kai Havertz en Kepa varði aðra spyrnu Villarreal, frá alsírska varnarmanninum Aissa Mandi.

Christian Pulisic og Juan Foyth skoruðu þá báðir í fyrstu spyrnu hvors liðs í bráðabana áður en Antonio Rudiger skoraði fyrir Chelsea til að setja pressu á Raúl Albiol sem tók sjöttu spyrnu Villarreal. Kepa varði þá aðra spyrnu sína og Chelsea því Ofurbikarsmeistari Evrópu.

Vítaspyrnukeppnin

0-0 Kai Havertz klúðrar - varið af Asenjo

0-1 Gerard Moreno skorar

1-1 Cesar Azpilicueta skorar

1-1 Aissa Mandi klúðrar - varið af Kepa

2-1 Marcos Alonso skorar

2-2 Pervis Estupinan skorar

3-2 Mason Mount skorar

3-3 Moi Gómez skorar

4-3 Jorginho skorar

4-4 Daniel Raba

5-4 Christian Pulisic skorar

5-5 Juan Foyth skorar

6-5 Antonio Rudiger skorar

6-5 Raúl Albiol klúðrar - varið af Kepa

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.