Si Woo var að keppa á WGC-FedEx St. Jude Invitational mótinu á PGA-mótaröðinni um helgina þegar honum tókst að slá kúluna sína fimm sinnum í vatnið og það á sömu holunni.

Kim Si Woo var á parinu á deginum og fimm yfir samanlagt á mótinu þegar hann hafði lokið leik á tíu fyrstu holum dagsins. Hann var með tvo fugla og tvo skolla á hringnum þegar framundan var ellefta holan sem er par þrjú hola.

Það er óhætt að segja að þar hafi allt farið í vaskinn eða vatnið ættum við kannski frekar að segja á þessari elleftu holu.

Woo byrjaði að setja teighöggið sitt í vatnið og þurfti að slá aftur 87 metrum frá holunni en setti boltann ítrekað aftur og aftur í vatnið. Á endanum hafði hann sett fimm golfbolta í röð í vatnið.

Þegar hann komst loksins á flötina þá var hann kominn með ellefu högg á holunni. Hann hann kláraði síðan þessa par þrjú holu á þrettán höggum eða tíu höggum yfir pari.

Þetta voru flest högg sem kylfingur hafði tapað á einni par þrjú holu á PGA móti frá árinu 1983 þegar risamótin eru ekki talin með.

Kim Si Woo gafst samt ekki upp á hringnum. Hann fékk fugl á næstu holu og alls fjóra fugla á síðustu sjö holum dagsins. Hann endaði samt í neðsta sæti mótsins á átta höggum yfir parinu.

Þetta var alvöru kylfingur sem var að lenda í þessum hrakningum. Woo er 26 ára gamall og hefur unnið fjögur mót á PGA mótaröðinni. Hann hefur hæst komist í 28. sæti á heimslistanum sem var í maí 2017 en er nú í 54. sæti listans.