Í úrslitaleiknum á laugardaginn mætir Danmörk Frakklandi. Þessi lið mættust einnig í úrslitaleiknum í Ríó fyrir fimm árum.
Mikkel Hansen og Nicklas Landin drógu danska vagninn í leiknum í dag. Hansen skoraði tólf mörk og var markahæstur á vellinum og Landin varði frábærlega.
Danir náðu frumkvæðinu eftir þrjú mörk í röð um miðbik fyrri hálfleik og voru eftir það alltaf í bílstjórasætinu. Staðan í hálfleik var 10-14, Danmörku í vil eftir að Hansen skoraði með skoti í tómt markið í þann mund sem fyrri hálfleikurinn rann sitt skeið.
Spánverjar tóku áhlaup í seinni hálfleik og minnkuðu muninn tvisvar sinnum í eitt mark. En Danir sýndu styrk sinn undir lokin og unnu fjögurra marka sigur, 23-27. Mads Mensah var drjúgur á lokakaflanum og skoraði þá tvö af fjórum mörkum sínum. Mathias Gidsel var næstmarkahæstur í danska liðinu með fimm mörk.
Adrian Figueras og Alex Dujshebaev skoruðu fimm mörk hvor fyrir Spán og Gonzalo Perez De Vargas átti góðan leik í markinu. Spánverjar mæta Egyptum í leiknum um 3. sætið á laugardaginn.
