DeChambeau greindist með veiruna rétt áður en hann átti að fljúga til Tókýó. Fyrstu tvo dagana eftir að hafa greinst fann hann ekki fyrir neinum einkennum en þau komu fram síðar. DeChambeau sagðist hafa fundið fyrir þreytu og hefur misst 4-5 kg undanfarnar tvær vikur.
DeChambeau fór ekki í bólusetningu og sér ekki eftir því þrátt fyrir að veiran hafi gert út um Ólympíudrauminn hans.
„Bólusetning kemur ekki endilega í veg fyrir að þú smitist. Ég er enn ungur og vil frekar að eldra fólk sem þarf á því að halda verði bólusett. Mér finnst ekki gott að taka bóluefni frá einhverjum sem þarf það,“ sagði DeChambeau þrátt fyrir að engin vöntun sé á bóluefnum í Bandaríkjunum samkvæmt sóttvarnayfirvöldum þar í landi.
DeChambeau útilokar samt ekki að láta bólusetja sig þegar fram líða stundir. Bandaríkjamaðurinn snýr aftur á golfvöllinn í dag þegar hann keppir á WGC-FedEx St. Jude Invitational.
Landi DeChambeaus, Xander Schauffele, hrósaði sigri í golfkeppninni á Ólympíuleikunum.
DeChambeau var ekki eini þekkti kylfingurinn sem gat ekki keppt á Ólympíuleikunum eftir að hafa greinst með veiruna því Spánverjinn Jon Rahm, efsti maður heimslistans, lenti í því sama. Hann greindist einnig með veiruna í júní á meðan Memorial-mótinu stóð.
