Uppnám innan Miðflokksins eftir að Þorsteinn neitaði að víkja

Jakob Bjarnar skrifar 16. júlí 2021 14:36

Þingmennskan lætur vel við Þorsteinn Sæmundsson sem telur sig greinilega eiga ýmsu ólokið á Alþingi en afstaða hans, að neita að láta átakalaust af hendi oddvitasætið í Reykjavík suður, hefur hleypt öllu í bál og brand innan Miðflokksins. vísir/vilhelm

Þorsteinn Sæmundsson þingmaður Miðflokksins neitaði að beygja sig undir þau áform, sem honum höfðu verið kynnt, að vera ekki stillt upp sem oddvita flokksins í Reykjavík fyrir komandi alþingiskosningar.

Viljinn greinir frá því að tillaga uppstillingarnefndar Miðflokksins í Reykjavíkurkjördæmi suður um framboðslista fyrir komandi alþingiskosningar hafi verið felld á félagsfundi í gærkvöldi. Tillagan gekk út á það að efsta sæti myndi Fjóla Hrund Björnsdóttir, framkvæmdastjóri þingflokks Miðflokksins, skipa í stað Þorsteins.

Harðneitar að hætta

Samkvæmt heimildum Vísis brást Þorsteinn illa við þessu og gekk í að smala samherjum sínum á fundinn og var tillagan felld með 30 atkvæðum gegn fjórtán. Að sögn Viljans sækist Þorsteinn eftir oddvitasætinu eftir sem áður en málið er í uppnámi.

Eftir því sem Vísir kemst næst stóð stjórn kjördæmafélagsins heilshugar að baki ákvörðun uppstillinganefndar en til þess er meðal annars litið að Þorsteinn sé kominn á eftirlaunaaldur og eigi rétt á biðlaunum frá Alþingi og/eða starf hjá umhverfisráðuneyti til sjötugs þar sem hann starfaði áður en hann fór á þing, kæri Þorsteinn sig um það. Sem hann greinilega gerir ekki. Viðbrögð Þorsteins komu flatt upp á forystu flokksins og hafa sett áform um að jafna kynjaskiptingu í uppnám; ráðgert var að þrjár konur skipi oddvitasæti flokksins fyrir komandi kosningar.

Einn Miðflokksmaður sem Vísir ræddi við lýsir þessu sem þvermóðsku og óvæntum bolabrögðum af hálfu Þorsteins. Formaður uppstillinganefndar er Guðlaugur Sverrisson en Vísi tókst ekki að ná tali af honum.

Það sem er á milli þeirra Sigmundar er á milli þeirra Sigmundar

(Uppfært 14:55)

Þorsteinn sjálfur segist ekki geta lagt mat á það hvort menn eru óánægðir með hann; hann geti lítt tjáð sig um það. En Miðflokkurinn sé lýðræðisfylking og það hafi menn verið að nýta sér.

„Ég á stuðningsmenn. Þeir voru ekki ánægðir með minn hlut og létu það í ljós á lýðræðislegum vettvangi. Það mun finnast farsæl lausn á þessu og við munum koma sterkari út úr þessu en áður. Sameinuð og allt í góðu.“

Þorsteinn segist spurður um hvort hann hafi rætt þessa stöðu við formann flokksins, Sigmund Davíð Gunnlaugsson að þeir ræði oft saman og það sem þeir ræði sé þeirra á milli.

En þú vilt ekki meina að þú sért með þessu að bregða fæti fyrir flokkinn í komandi kosningum?

„Alls ekki. Stefnumál Miðflokksins eru ekki enn komin til umræðu en ég held að við munum koma mörgum á óvart með okkar kosningamálum. Þar munum við færa fram þessa djörfu skynsemishyggju sem við erum þekkt fyrir. Ég get ekki beðið eftir því að tala fyrir því, ég veit að það mun veita okkur gott brautargengi.“

Miðflokkurinn Alþingiskosningar 2021

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.