Fótbolti

Kol­beinn spenntur fyrir komu hins þaul­reynda Marcus Berg

Runólfur Trausti Þórhallsson skrifar
Kolbeinn Sigþórsson, framherji Gautaborgar í Svíþjóð og íslenska landsliðsins.
Kolbeinn Sigþórsson, framherji Gautaborgar í Svíþjóð og íslenska landsliðsins. fotbollskanalen.se

Samherji Kolbeins Sigþórssonar hjá IFK Gautaborg segir hann einn besta framherja sænsku úrvalsdeildarinnar þegar hann er meiðslalaus. Sænski landsliðsframherjinn Marcus Berg mun ganga til liðs við félagið á næstunni og gæti sæti Kolbeins í byrjunarliðinu verið í hættu.

„Fyrir mér er hann besti framherji í deildinni. Þegar hann er heill heilsu eru fáir betri hann. Hann átti mjög góðan leik í dag,“ sagði Tobias Sana við Fotbollskanalen eftir leikinn gegn Elfsborg. 

Kolbeinn átti fínan leik þó hann hafi ekki skorað, hann fiskaði vítaspyrnu í fyrri hálfleik sem fór því miður forgörðum og þá hefði hann að öllum líkindum jafnað metin undir leiks hefði markvörður Gautaborgar ekki þvælst fyrir honum.

Kolbeinn meiddist á undirbúningstímabilinu en er hægt og rólega að komast í sitt gamla form.

„Ég er alltaf að færast nær og nær. Ég held að ég sé ekki enn 100 prósent en mér líður eins og ég geti gefið meira af mér. Því betra formi sem ég er í, því betri færi kemst ég. Þetta er enn í vinnslu og ég reyni að vinna eins og ég get fyrir liðið. Ég tel það ganga ágætlega, við þurfum samt að bæta okkur og ná í fleiri stig,“ sagði Kolbeinn sjálfur.

„Ef við hefðum nýtt vítaspyrnuna hefði þetta verið allt annar leikur. Elfsborg gerði vel i að nýta færið sem þeir fengu,“ bætti hann við áður en hann hrósaði Mikael Stahre, nýráðnum þjálfara liðsins.

„Mér líður eins og Micke hafi rifið okkur upp. Fengið okkur til að hlaupa meira, pressa betur og berjast af meiri krafti. Við sjáum nú að við getum hlaupið yfir mótherja okkar. Auðvitað var þetta fyrsti leikurinn undir hans stjórn en ég tel frammistöðuna lofa góðu. Til að vinna leiki þarftu að vera skynsamur og nýta færin sem þú færð, því við fengum færi.“

Landsliðsframherji Svíþjóðar á heimleið

Reynsluboltinn Marcus Berg mun ganga til liðs við Gautaborg í sumar eftir fjölda ára erlendis. Hefur hann leikið með Groningen, Hamburger, PSV, Panathinaikos, Al Ain og Krasnodar á ferli sínum. Þá á þessi 34 ára gamli framherji 90 landsleiki að baki en hann byrjaði tvo af fjórum leikjum Svía á EM.

Endurkoma Berg mun valda Stahre vandræðum þar sem hann spilaði 4-2-3-1 leikkerfi gegn Elfsborg en þarf nú að ákveða hvort hann spili landsliðsframherjunum saman upp á topp eða geymi annan á bekknum.

„Mér líkar vel við þetta kerfi en Marcus er markaskorari og ég er vanur að spila leikkerfi með tvo framherja líkt og hjá íslenska landsliðinu. Ég er ánægður að hann sé að koma með öll sín gæði. Ég hlakka til að spila með honum,“ sagði Kolbeinn um endurkomu Berg sem skoraði á sínum tíma 21 mark fyrir félagið.

Marcus Berg í leik gegn Spáni á EM.EPA-EFE/Jose Manuel Vidal

Gautaborg er í 12. sæti sænsku úrvalsdeildarinnar, aðeins stigi fyrir ofan Östursund sem situr í sætinu sem fer í umspil um að halda sæti sínu í deildinni. Liðið hefur aðeins unnið einn af níu fyrstu leikjum sínum á tímabilinu, gert sex jafntefli og tapað tveimur leikjum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.