Atvinnulíf

Rifrildin heima fyrir eftir vinnu

Rakel Sveinsdóttir skrifar
Streita og vinnuálag hefur ólík áhrif á okkur og það getur myndað spennu á milli para að ræða ekki hvernig okkur líður eftir vinnu og hvað okkur langar mest að gera þegar að við komum heim.
Streita og vinnuálag hefur ólík áhrif á okkur og það getur myndað spennu á milli para að ræða ekki hvernig okkur líður eftir vinnu og hvað okkur langar mest að gera þegar að við komum heim. Vísir/Getty

Við ræðum oft um mikilvægi þess að aðskilja vinnu og einkalíf. Sem þó getur verið hægara sagt en gert. Því satt best að segja getur líðanin okkar verið mjög mismunandi þegar að við komum heim eftir vinnu.

Annar aðili í parsambandi gæti til dæmis verið mjög félagslega mettaður eftir daginn. Búin/n að hitta mikið af fólki og þráir það heitast að koma heim í ró og næði.

Á meðan hinn aðilinn vinnur meira einn og sér. Langar að gera eitthvað með makanum eftir vinnu, þó ekki væri nema að taka gott spjall.

Strax þarna getur myndast spenna á milli para.

Þessi spenna getur magnast og endað í rifrildi, þótt orsökin sé í raun ekki önnur en sú að líðanin okkar er ólík eftir ólíka vinnudaga, ólíkt vinnuálag eða ólíkt vinnuumhverfi.

Þá er það staðreynd að streita og vinnuálag maka getur haft bein áhrif á parsambandið.

Í umfjöllun Wall Street Journal segir til dæmis frá hjónabandi sem lagaðist til muna, eftir að eiginmaðurinn hreinlega skipti um starf og fór að vinna við eitthvað sem gerði hann ekki eins stressaðan og áður. Heima fyrir lagaðist margt í kjölfarið og þá helst vegna þess að erfiðar skapsveiflur hjá honum nánast hurfu, enda leið honum betur sjálfum.

Þá hafa rannsóknir sýnt að fólk á það til að taka streitu maka inn á sig. Sem aftur þýðir að þessi streituáhrif hafa áhrif á það sem við gerum. Til dæmis hvernig okkur gengur í okkar eigin vinnu.

En hvað er til ráða þegar að streita og vinnuálag maka er farin að hafa veruleg áhrif á parsambandið eða fjölskyldulífið? 

Niðurstöður rannsókna sýna að besta ráðið felst í auknum samskiptum um það hvernig okkur líður eftir vinnu eða sökum vinnuálags.

Í þessum samskiptum leggja báðir aðilar spilin á borðið. Lýsa því hvernig þeim líður eftir vinnu. Hvernig þau upplifa streitu og vinnuálag. Hverjar þarfirnar eru eftir vinnu og hvað okkur langar mest til að gera eftir vinnu.

Já, við segjum frá því hverjar okkar þarfir eru og hlustum á það hverjar þarfir makans eru.

Sameiginlegt verkefni er síðan að finna út úr því hvernig pör geta mæst á miðri leið.

Í umfjöllun Wall Street Journal eru nokkur góð ráð gefin. Til dæmis er sagt frá hjónum sem endurskoðuðu rútínuna sína eftir vinnu og breyttu því hvernig verkefnaskiptin voru varðandi krakkana og heimilishald. Þessi breyting létti á spennu eftir vinnudaginn og hafði góð áhrif á parsambandið.

Að skoða sameiginleg áhugamál eða hreyfingu er líka af hinu góða og eins er mælt með því að pör séu í samskiptum yfir daginn, ekki bara þegar að vinnudegi lýkur. Útgangspunktur þessara samskipta á þá ekki að snúast um hvor aðilinn ætlar að versla eða sækja krakkana, heldur spyrjum við makann okkar hreinlega um það hvernig honum/henni líður.


Tengdar fréttir

Að vinna of mikið er í orðsins fyllstu merkingu að drepa okkur

Í nýlegri grein BBC er sagt frá niðurstöðum alþjóðlegrar rannsóknar sem sýna að sífellt fjölgar í þeim hópi fólks sem deyr of ungt í kjölfar of mikillar vinnu. Greinin ber yfirskriftina „How overwork is literally killing us.“ Ótímabært dauðsfall sem afleiðing af of mikilli vinnu, er algengara hjá körlum en konum. 

Vinnualkar og helstu einkenni þeirra

Við tölum oft um fólk sem við teljum vera algjöra vinnualka. Eða viðurkennum okkur sjálf sem vinnualka. Stundum tölum við um að það sé jákvætt að vera vinnualki. Svona eins og það sé tilvísun í að vera mjög duglegur í vinnu.

Jafnræði heima fyrir en ekki vitlaust að setja sér reglur og mörk

Við tölum oft um jafnvægi heimilis og vinnu, veltum fyrir okkur hvort vinnustaðir teljist fjölskylduvænir, hvort jafnræði ríki á milli kvenna og karla í uppeldis- og heimilisverkum og mikilvægi styttingu vinnuvikunnar. En hvað segja ungu foreldrarnir sjálfir sem stunda fulla vinnu, samhliða því að ala upp ung börn, byggja upp heimili, láta sig umhverfismálin varða og lifa á tímum samfélagsmiðla?





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.