Er efstur en náði ekki að klára tvær síðustu holurnar sínar

Louis Oosthuizen spilaði á fjórum höggum undir pari eins og Russell Henley en Suður Afríkumaðurinn náði samt ekki að klára fyrsta hringinn sinn. Oosthuizen á nefnilega eftir að klára tvær holur á hringnum.

Það tókst ekki að klára hringinn fyrir myrkur og því munu ágætur hópur kylfinga byrja annan daginn á því að spila síðustu holurnar á hringnum. Keppni tafðist um daginn vegna þoku.

Ítalinn Francesco Molinari og Spánverjinn Rafa Cabrera Bello léku báðir fyrstu átján holurnar á þremur höggum undir pari og deila þriðja sætinu.

Það er líka nóg af frábærum kylfingum í kringum þessa fjóra. Brooks Koepka, Rory McIlroy, Francesco Molinari, Xander Schauffele, Hideki Matsuyama og Jon Rahm eru allri stutt á eftir.

Brooks Koepka hélt áfram að gera frábæra hluti á risamótum en hann lék hringinn á 69 höggum eða tveimur höggum undir pari. Þetta var sjötti hringur hans í röð á risamóti þar sem hann kemur inn á 60 og eitthvað.

Það gekk hins vegar mun verra hjá Bryson DeChambeau sem vann mótið í fyrra og hinum gamalreynda Phil Mickelson sem vann síðasta risamót og ætlaði sér stóra hluti á mótinu sem hann hefur aldrei unnið.

Bryson DeChambeau vann opna bandaríska mótið í fyrra en lék fyrsta hringinn tveimur höggum yfir pari. Það skilar honum bara í 61. sæti. Mickelson er enn neðar eða á fjórum höggum yfir pari í 96. sæti.