Körfubolti

Vanessa Bryant sendir Nike tóninn vegna skóa sem voru hannaðir í minningu dóttur hennar

Ingvi Þór Sæmundsson skrifar
Bryant-fjölskyldan á góðri stund.
Bryant-fjölskyldan á góðri stund. getty/Christopher Polk

Vanessa Bryant, ekkja Kobes Bryant, er ósátt við íþróttavöruframleiðandann Nike vegna skóa sem voru hannaðir í minningu dóttur hennar sem lést í þyrluslysi ásamt föður sínum í fyrra.

Vanessa gagnrýndi Nike í færslu á Instagram eftir að hún komst að því að skór, MAMBACITA, sem voru hannaðir í minningu Giönnu, dóttur hennar, væru farnir í dreifingu.

Vanessa segir að ekkert samráð hafi verið haft við sig þegar skórnir voru framleiddir og er afar ósátt við að óprúttnir aðilar ætli sér að reyna að græða á því að selja skóna. 

Hún segir þeir hafi ekki átt að fara í almenna sölu og tilgangurinn með því að gera þá hafi verið að safna fé fyrir góðgerðamál. Vanessa segir að Bryant-fjölskyldan hafi ekki enn fengið skóna og skilur ekki hvernig þeir rötuðu í hendur þriðja aðila.

MAMBACITA skórnir eru á litinn eins og körfuboltabúningur Giönnu og með númerinu hennar (2). Inni í skónum eru svo myndir af fiðrildi, vængjum og geislabaug.

Gianna var aðeins þrettán ára þegar hún lést í þyrluslysinu ásamt föður sínum og sjö öðrum 26. janúar 2020.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.