Vita ekkert um auðgun úrans í Íran frá því í febrúar

Íranar drógu úr aðgengi eftirlitsaðila með því markmiði að þrýsta á ríkisstjórn Joes Biden, forseta Bandaríkjanna. Erindrekar ríkjanna eiga nú í viðræðum um að Bandaríkin verði aftur aðilar að kjarnorkusamkomulaginu svokallaða frá 2015.

IAEA segist nú ekki vita hve mikið úran Íranar hafa auðgað og í hvaða hreinleika. Þetta kemur fram í skýrslu stofnunarinnar sem blaðamenn AP fréttaveitunnar hafa komið höndum yfir.

Kjarnorkuvísindamenn Írans byrjuðu að auðga úran í 60 prósent hreinleika í apríl en það er nálægt því sem þarf til að framleiða kjarnorkuvopn. Samkvæmt kjarnorkusamkomulaginu sem vonast er að hægt verði að endurvirkja, máttu Íranar ekki auðga úran meira en 3,67 prósent. Eftir að Donald Trump, fyrrverandi forseti Bandaríkjanna, sleit Bandaríkin frá samkomulaginu árið 2018 hófu Íranir að auðga úran í 20 prósent.

Sjá einnig: Segjast geta auðgað úran að vild

Kjarnorkusamkomulagið var gert á milli Írans, Bandaríkjanna, Kína, Rússlands, Bretlands, Frakklands og Þýskalands og var því ætlað að binda enda á kjarnorkuvopnaáætlun Írans. Í skiptum fyrir að þvingunum og öðrum refsiaðgerðum yrði aflétt samþykktu yfirvöld Írans að þróa ekki kjarnorkuvopn og hleypa eftirlitsaðilum í landið.

Til að framleiða kjarnorkuvopn þarf að auðga úran í 90 prósenta hreinleika, en það ku vera tiltölulega auðvelt að gera við úran sem þegar er búið að auða í 60 prósent.

IAEA segist í raun ekki geta sagt til um hve mikið úran búið sé að auðga í Íran. Einungis sé hægt að áætla það. Stofnunin telur að í heild eigi Íranar um 3.241 kíló af úrani. Þar af séu 62.8 kíló auðguð í tuttugu prósent og 2,4 kíló auðguð í sextíu prósent.

Eftir að lokað var á aðgengi IAEA að kjarnorkurannsóknarstöðum Írans gerði stofnunin samkomulag við ríkið um að upptökur úr öryggismyndavélum rannsóknarstöðvanna yrðu geymdar svo eftirlitsaðilar gætu farið yfir þær ef erindrekar Írans og Bandaríkjanna kæmust að samkomulagi.

Náist það ekki verður myndefninu eytt.