Veðbankar spá Natani sigri í kvöld

Núna eins og síðast kjósa áhorfendur og geta Íslendingar og aðrir utan Noregs kosið í gegnum vefsíðu TV2.no eftir að þátturinn hefst. Hver og einn getur kosið þrisvar.

„Við erum að vonast eftir sem bestri kosningu að heiman. Stöndum saman, kjósum Natan,“ segir Benedikt Viggósson, pabbi Natans í samtali við fréttastofu.

Norskir veðbankar spá Natani sigri.

„Þess vegna er mikilvægt að fólk kjósi hann því það er svo mikil hætta á að fólk sleppi því að kjósa þann sem spáð er sigri,“ segir Benedikt, pabbi Natans.

Fjórir keppendur taka þátt í úrslitaþættinum sem verður skipt upp í tvo hluta. Eftir fyrri hlutann falla tveir keppendur úr leik og hinir tveir taka annað lag í baráttunni um sigurinn í The Voice Norway.

Hægt verður að fara inn á vefsíðu TV2 í kvöld og þar verður borði efst á forsíðunni þar sem hægt verður að kjósa.

„Natan vill gera heiminn að betri stað með tónlist sinni. Hann er með stórt hjarta og fallega sál þessi strákur,“ sagði Benedikt, pabbi Natans.

Í kvöld mun Natan Dagur flytja lagið Lost on You með Lewis Capaldi sem fyrra lag í úrslitunum. Ef hann kemst áfram í seinni umferðina tekur hann lagið Half a man með Dean Lewis.