Handbolti

KA hefði þurft að reiða sig alfarið á táning í markinu en leikur þess í stað þétt

Sindri Sverrisson skrifar
Hinn 19 ára Bruno Bernat er eini markvörðurinn sem KA hefur til taks á meðan að Nicholas Satchwell er með færeyska landsliðinu og Svavar Ingi Sigmundsson meiddur.
Hinn 19 ára Bruno Bernat er eini markvörðurinn sem KA hefur til taks á meðan að Nicholas Satchwell er með færeyska landsliðinu og Svavar Ingi Sigmundsson meiddur. vísir/Elín Björg

KA mun spila sex leiki á aðeins nítján dögum í maí, í Olís-deild karla í handbolta, eftir að félagið fékk tveimur næstu leikjum sínum frestað vegna landsleikja.

Sævar Pétursson, framkvæmdastjóri KA, segir að fátt annað hafi verið í stöðunni en að biðja um frestun. Markvörðurinn Nicholas Satchwell og hornamaðurinn Allan Norðberg voru valdir í færeyska landsliðið. Annar markvörður liðsins, Svavar Ingi Sigmundsson, spilar svo ekki meira á leiktíðinni vegna meiðsla.

Það hefði því komið í hlut hins 19 ára gamla Bruno Bernat að spila næstu tvo leiki í marki KA, með engan varamarkvörð til taks á bekknum. Hvert stig skiptir KA máli en liðið er í 8. sæti, í harðri baráttu um sæti í úrslitakeppninni í sumar.

„Þetta var kannski ekki erfið ákvörðun. Nicholas markmaður var að fara að spila með Færeyingunum og Svavar er meiddur, búinn í aðgerð, og verður ekki meira með á leiktíðinni. Við hefðum aldrei spilað þessa leiki eingöngu með Bruno, ungan strák úr 3. flokki. Ef að eitthvað hefði komið fyrir hann hefðum við svo bara verið með útileikmann í markinu,“ sagði Sævar.

Leikjadagskrá KA í maí:

  • 9. maí: ÍR - KA
  • 13. maí: Afturelding - KA
  • 16. maí: KA - ÍBV
  • 20. maí: KA - FH
  • 24. maí: Valur - KA
  • 27. maí: KA - Þór

„Ef að Svavar hefði ekki verið meiddur og nýfarinn í aðgerð þá hefði þetta kannski litið öðruvísi út. Svo er Allan líka að fara í þessa landsleiki, þannig að þetta var aldrei vafi í okkar huga. Þetta kallar vissulega á strembið prógramm þegar menn fara aftur af stað en þetta eru bara þær aðstæður sem við búum við. Við tæklum þetta,“ sagði Sævar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.