Handbolti

FH getur ógnað Haukum þegar hand­boltinn skoppar af stað í dag

Sindri Sverrisson skrifar
FH-ingar snúa aftur til leiks í kvöld og geta minnkað forskot Hauka á toppnum í tvö stig. Selfoss er í 6. sæti og tekur á móti botnliði ÍR á sunnudag.
FH-ingar snúa aftur til leiks í kvöld og geta minnkað forskot Hauka á toppnum í tvö stig. Selfoss er í 6. sæti og tekur á móti botnliði ÍR á sunnudag. vísir/Hulda Margrét

FH getur strax hleypt mikilli spennu í titilbaráttuna í Olís-deild karla í handbolta þegar keppni í deildinni hefst að nýju í kvöld.

Hlé hefur verið á deildinni í mánuð vegna kórónuveirufaraldursins en leikið verður ört næstu vikurnar. Eftir svolitla samskiptaörðugleika virðist leikjadagskráin núna öllum að skapi og verða síðustu sjö umferðirnar leiknar áður en maí er úti. Úrslitakeppnin verður svo í júní.

Haukar eru í góðri stöðu á toppi Olís-deildarinnar með 25 stig og grannar þeirra í FH virðast helst geta náð þeim. FH er fjórum stigum á eftir Haukum en liðin mætast í lykilleik á Ásvöllum 17. maí.

Næstu leikir og staðan í Olís-deild karla í handbolta.

FH getur minnkað forskot Hauka í tvö stig með sigri gegn Fram í Safamýri í kvöld. Keppni í deildinni hefst hins vegar á leik Gróttu og KA, í beinni útsendingu á Stöð 2 Sport 4 kl. 16.

KA-menn eru sem stendur í 9. sæti með 15 stig en aðeins tveimur stigum frá 4. sæti. Ljóst er því að baráttan verður hatrömm um að forðast 9. sætið og ná sæti í átta liða úrslitakeppninni.

Á laugardag og sunnudag er svo fimm leikir. Þórsarar mæta þá Val og þurfa helst á sigri að halda í baráttu sinni fyrir áframhaldandi veru í deildinni. Þeir eru fjórum stigum frá næsta örugga sæti, sem Grótta situr í.

ÍR-ingar eru enn án stiga á botni deildarinnar og aðeins tímaspursmál hvenær þeir falla en það verður þó ekki strax á sunnudag þegar þeir mæta Selfyssingum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.