Handbolti

Aron segir að kaupin á Mikkel Hansen hafi spilað stóra rullu í að hann valdi Álaborg

Ingvi Þór Sæmundsson skrifar
Aron Pálmarsson og Mikkel Hansen verða samherjar hjá Álaborg frá og með sumrinu 2022.
Aron Pálmarsson og Mikkel Hansen verða samherjar hjá Álaborg frá og með sumrinu 2022. vísir/vilhelm/getty/Slavko Midzor

Aron Pálmarsson kveðst afar spenntur fyrir komandi tímum hjá Álaborg. Hann segir að félagaskipti Mikkels Hansen til Álaborgar hafi kveikt áhuga hjá sér á félaginu.

Álaborg greindi í morgun frá því að Aron hefði samið við félagið og kæmi til þess frá Barcelona í sumar. Hann er enn eitt stóra nafnið sem Álaborg semur við en þar á bæ er mikið ofurlið í smíðum.

Í samtali við Ríkharð Óskar Guðnason sagði Aron að Álaborg hefði sett sig í samband við hann fyrir tæpum tveimur mánuðum.

„Það er kannski ekki langt síðan en sex til sjö vikur. Þetta tók ekkert alltof langan tíma þegar þetta kom upp,“ sagði Aron við Rikka.

„Þetta var verkefni sem ég hafði áhuga á. Þeir voru búnir að semja við nokkra mjög sterka leikmenn og sögðu mér frá sínum framtíðarplönum og hver metnaður þeirra væri. Það heillaði mig gríðarlega.“

Sýnir metnað félagsins

Álaborg hefur þegar samið við Mikkel Hansen sem kemur til félagsins frá Paris Saint-Germain þarnæsta sumar. Aron segir að það hafi átt sinn þátt í því að hann ákvað að velja Álaborg.

„Það sýnir metnaðinn í félaginu og hvað þeir ætla sér að gera. Auðvitað voru það stórar fréttir þegar Mikkel samdi og svo rétt eftir það höfðu þeir samband við mig. Það spilaði stóra rullu. Ég skal alveg vera heiðarlegur með það. Það kveikti meiri áhuga þegar þeir höfðu samband. Þá vildi ég alveg hlusta á að hvað þeir voru að pæla,“ sagði Aron.

Ætlar að raða inn titlum

Hann hefur unnið fjölmarga titla með sínum félagsliðum undanfarin ár og ætlar að halda því áfram hjá Álaborg.

„Ég þekki ekkert annað en að vera í liðum sem eru alltaf að berjast um titla og þeir hafa verið ófáir hjá mér. Að sjálfsögðu er ég að fara þangað til að raða inn titlum eins og þú segir. Það hefur alltaf verið mitt markmið, frá því ég var í FH og þangað til ég hætti að spila,“ sagði Aron.

„Það má ekki gleyma því að þótt þetta hafi ekki verið stórt félag í Evrópu er þetta besta félag Danmerkur. Þeir hafa orðið nokkrum sinnum meistarar síðasta áratuginn og eru ríkjandi meistarar.“

Fleiri hlutar úr viðtalinu við Aron birtast á Vísi síðar í dag. Einnig verður rætt við hann í Sportpakkanum á Stöð 2.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.