Erlent

Tékkar lýsa eftir sömu Rússum sem sakaðir voru um Skripal-árásina vegna stórrar sprengingar 2014

Samúel Karl Ólason skrifar
Sömu menn og ákærðir hafa verið fyrir að eitra fyrir Sergei Skripal og dóttur hans fóru til Tékklands en þá undir öðrum nöfnum.
Sömu menn og ákærðir hafa verið fyrir að eitra fyrir Sergei Skripal og dóttur hans fóru til Tékklands en þá undir öðrum nöfnum. Lögreglan í Tékklandi

Yfirvöld Tékklands vísuðu í gær átján rússneskum erindrekum úr landi og lýstu eftir tveimur rússneskum útsendurum vegna sprengingar í vopnageymslu árið 2014. Útsendararnir sem lýst var eftir eru þeir sömu og voru sakaðir um að eitra fyrir Sergei Skripal og dóttur hans með taugaeitrinu Novichok í Salisbury í Bretlandi árið 2018.

Andrej Babis, forsætisráðherra Tékklands, sagði í gær að erindrekarnir átján tengdust allir leyniþjónustum Rússlands og hefðu tvo sólarhringa til að yfirgefa landið. Hann sagði ríkisstjórn sína verða að bregðast við upplýsingum sem tengt hafi Rússa við sprenginguna nærri bænum Vrbetice.

Samhliða blaðamannafundi Babis lýsti lögreglan eftir þeim tveimur mönnum vegna sprengingarinnar og sagði þá hafa verið í Tékklandi á milli 11. október og 16. október 2014. Sama tíma og sprengingin varð. Fyrst hafi þeir verið í Prag og svo hafi þeir sést nærri vopnageymslunni, samkvæmt frétt BBC.

BBC segir að meðal sönnunargagna Tékka sé tölvupóstur sem barst til Imex Group, fyrirtækisins sem rak vopnageymsluna, í aðdraganda sprengingarinnar. Sá póstur átti að vera frá Þjóðvarðliði Tadsíkistan og fjallaði um beiðni fyrir tvo menn til að skoða vopnageymsluna.

Mennirnir tveir voru sagðir heita Ruslan Tabarov, frá Tadsíkistan, og Nicolaj Popa, frá Moldóvíu. Myndirnar sem fylgdu tölvupóstinum voru þó af sömu mönnum og ferðuðust til Bretlands árið 2018 undir nöfnunum Ruslan Boshirov og Alexander Petrov.

Þeir hafa verið ákærðir fyrir að eitra fyrir rússneska njósnaranum Sergei Skripal og dóttir hans.

Þegar þeir flugu til Prag í október 2014 notuðust þeir við nöfnin Boshirov og Petrov en ekki nöfnin sem þeir notuðu til að fá að skoða vopnageymsluna. Þeir gistu í Prag í tvær nætur og bókuðu svo hótel í nokkrar nætur til viðbótar, skammt frá vopnageymslunni sem sprakk.

Í rauninni er talið að þeir heiti Anatolíj Tsjepiga og Alexander Mishkin og hafa þeir verið opinberaðir sem starfsmenn GRU, leyniþjónustu herafla Rússlands.

Mennirnir eru sagðir hafa tilheyrt sérstakri deild í GRU sem kallaðist Unit 29155 og sérfræðingar telja að hafi verið notuð til launmorða og skemmdarverka.

Sprengingin sem um ræðir varð þann 16. október 2014. Um 50 tonn af skotfærum sprungu og dóu tveir í sprengingunni. Þá varð önnur sprenging í vopnageymslu Tékklandi í desember það ár þegar um þrettán tonn af skotfærum sprungu.

Yfirvöld í Rússlandi hafa gefið út að stjórnarskrá landsins heimili ekki framsal rússneskra ríkisborgara. Þá kemur fram í frétt Reuters að rússneskir fjölmiðlar hafi eftir formanni utanríkismálanefndar efra þings Rússlands að ásakanir Tékka séu fáránlegar og að ríkisstjórn Rússlands ætti að svara fyrir sig.


Tengdar fréttir

Telur Biden sjá sjálfan sig í sér

Vladímír Pútín, forseti Rússlands, segir ummæli Joes Biden, forseta Bandaríkjanna, um að Pútín væri „sálarlaus“ og „morðingi“, til marks um að Biden væri það sjálfur. Forsetinn rússneski gagnrýndi Bandaríkjamenn harðlega á fjarfundi í dag og sagði viðhorf þeirra endurspegla ofbeldisfulla sögu Bandaríkjanna.

Útsendarar FSB sagðir hafa eitrað fyrir Navalní

Sveit á vegum Leyniþjónustu Rússlands (FSB) eitraði fyrir Alexei Navalní. Útsendarar þessarar sveitar höfðu elt Navalní um árabil áður en eitrað var fyrir honum í Rússlandi í ágúst. Þrír útsendarar FSB flugu með Navalny til borgarinnar Tomsk, þar sem talið er að eitrað hafi verið fyrir honum.Tveir mannanna eru menntaðir sem læknar.

Segir Pútín hafa staðið að eiturárásinni

Alexei Navalní, rússneski stjórnarandstæðingurinn, sakar Vladímír Pútín, forseta Rússlands, um að hafa staðið að baki því að eitrað var fyrir honum með taugaeitrinu novichok í ágúst.

Pútín kallar Skripal svikara og drullusokk

Vladimir Pútín, forseti Rússlands, er ósáttur við að einhverjir fjölmiðlar séu að reyna að gera einhvern mannréttindasinna úr rússneska njósnaranum fyrrverandi, Sergei Skripal.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×