Þórólfur sýnir fordæmi og þiggur ekki bólusetningu sem læknir

Snorri Másson skrifar 10. apríl 2021 08:00

Þórólfur Guðnason sóttvarnalæknir bíður með að þiggja bólusetningu, enda röðin ekki komin að honum að hans mati. Vísir/Vilhelm

Þórólfur Guðnason sóttvarnalæknir ákvað að þiggja ekki boð í bólusetningu sem hann fékk sem heilbrigðisstarfsmaður á dögunum. „Ég er ekki að vinna með sjúklinga, þannig að ég bíð,“ segir Þórólfur.

„Ég hef skorað á þá heilbrigðisstarfsmenn utan stofnana sem ekki eru að sinna sjúklingum að bíða þar til að þeim kemur og ég hlíti mínum eigin fyrirmælum. Ég bíð bara þar til kemur að mér í aldri og það er ekkert alveg ljóst hvenær það verður,“ segir sóttvarnalæknir í samtali við fréttastofu.

Þórolfur er fæddur árið 1953, en bólusetningar á árganginum fæddum 1951 hófust í vikunni. Svo gengur þetta áfram kolli af kolli en Íslendingum eiga að berast um 62.000 skammtar af bóluefni í mánuðinum.

Sóttvarnalæknir gengur með sinni persónulegu ákvörðun á undan með góðu fordæmi fyrir þann fjölda óvirkra heilbrigðisstarfsmanna, sem er hvattur til að víkja fyrir fólki sem frekar þarf á bólusetningu að halda.

Bólusetningar hófust á Íslandi 29. desember 2020.Vísir/Vilhelm

Yfir 20.000 með starfsleyfi en alls ekki allir að sinna sjúklingum

Embætti landlæknis var ákveðinn vandi á höndum þegar fór að líða að bólusetningu forgangshóps númer fimm: „Öðrum heilbrigðisstarfsmönnum sem sinna sjúklingum með beinum hætti og nauðsynlegt er að hljóti bólusetningu gegn COVID-19 samkvæmt nánari ákvörðun sóttvarnalæknis.“

Til heilbrigðisstarfsmanna teljast 33 stéttir og yfir 20.000 starfsmenn. Ekki var unnt að hafa samband við alla einstaklinga á starfsleyfaskrá til að staðfesta að þeir sinntu klínískum störfum, þannig að allir fengu boð.

Næst sendi embættið út tilkynningu þar sem biðlað var til þeirra sem höfðu snúið til annarra starfa eða væru hættir störfum að þiggja ekki boðið. Hafa skyldi hugfast að „hver skammtur sem er notaður fyrir hóp 5 tefur lítillega bólusetningar einstaklinga með áhættuþætti fyrir alvarlegri COVID-19 sýkingu undir sextugu.“

Nokkur hópur fólks sem hefur starfsleyfi á sviði heilbrigðisþjónustu af ýmissi gerð hefur valið að fara í bólusetningu án þess að þurfa endilega eins mikið á því að halda og hópur 6 og 7, sem eru einstaklingar 60 ára og eldri og fólk með undirliggjandi langvinna sjúkdóma í sérstökum áhættuhópi.

9,4% Íslendinga 16 ára og eldri hafa þegar verið fullbólusettir og hjarðónæmi á að vera náð um miðjan júlí samkvæmt nýjustu upplýsingum frá stjórnvöldum.

Bólusetningar Almannavarnir Faraldur kórónuveiru (COVID-19) Heilbrigðismál Landspítalinn

Tengdar fréttir

Sérreglur fyrir ákveðna hópa erfiðar í framkvæmd

Ekki hefur verið skoðað sérstaklega að slaka á sóttvarnareglum fyrir fólk sem hefur verið bólusett gegn kórónuveirunni, að sögn sóttvarnalæknis. Hann telur að sérreglur fyrir bólusetta eða þá sem hafa fengið Covid-19 erfiðar í framkvæmd og eftirliti.

7. apríl 2021 19:16

Einhverjir mættu fyrr í von um að fá Pfizer en ekki AstraZeneca

Spurst hafði að í dag sé verið að bólusetja með Pfizer og vildu því einhverjir skjóta sér fram fyrir röðina í bólusetninguna.

7. apríl 2021 15:05

Gera ráð fyrir að geta fullbólusett 130 þúsund fyrir júnílok miðað við áætlun Pfizer

Bólusetningar gegn Covid-19 ganga vel, að sögn Þórólfs Guðnasonar sóttvarnlæknis, og verða 15 þúsund manns bólusettir í þessari viku. Vegna aukinnar framleiðslugetu Pfizer gera yfirvöld nú ráð fyrir að fullbólusetja 130 þúsund manns fyrir júnílok.

6. apríl 2021 12:04

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.