„Brynjar Trump Níels­son“ hafi hundsað hags­muni sam­fé­lagsins með Spánar­ferð

„Ég heyrði því fleygt að Brynjar Trump Níelsson hefði látið heyra frá sér frá Spáni, þar sem hann sagðist hafa farið þangað og átt ekkert erindi til útlanda og var á þann hátt að reka fingur framan í sóttvarnayfirvöld, sem mér finnst heldur vafasamt af kjörnum fulltrúa þjóðarinnar,“ sagði Kári í Kastljósi í kvöld og vísaði þar til viðtals við Brynjar sem birtist á Vísi í dag.

Brynjar kom aftur til Íslands í dag eftir tveggja vikna dvöl hjá bróður sínum á Spáni. Hann sagði ferðina vissulega ekki lífsnauðsynlega en hann hefði ekki áhyggjur af því að ferðin kynni að brjóta í bága við tilmæli sóttvarnalæknis.

Kári tók undir þau ummæli Þórólfs að það væri óæskilegt að fólk væri á flakki þegar veiran væri enn í mikilli útbreiðslu. Það væri alltaf hætta á að fólk bæri veiruna með sér heim, og í ofanálag þætti honum framkoma Brynjars ekki til sóma.

„Mér finnst það vera ruddaleg aðferð við að hundsa hagsmuni samfélagsins, hundsa tilraunir sóttvarnayfirvalda til þess að hlúa að heilsu fólks í landinu – mér finnst það mjög ljótt.“

Veirufrítt land raunhæfur möguleiki

Að mati Kára spila landamærin lykilhlutverk í því að hemja útbreiðslu faraldursins hér á landi. Það sé raunhæft að stefna að veirufríu landi, svo lengi sem aðgerðir á landamærunum skiluðu tilætluðum árangri og ekki yrði slakað á takmörkunum innanlands of fljótt.

Hann hefur þó litla trú á því að raunhæft sé að stefna á að svokallað litakóðunarkerfi geti tekið gildi þann 1. maí líkt og stefnt var að.

„Ég held að það líti enginn á það lengur sem raunverulegan möguleika, eða við skulum orða það þannig að ég held að menn geri sér grein fyrir því núna að það þýðir ekkert að gera áætlun langt fram í tímann þegar kemur að því að létta hömlum á hegðun.“

Hvað varðar nýja reglugerð heilbrigðisráðherra um kröfur til heimasóttkvíar telur Kári hana góða og gilda. Nú sé búið að skilgreina hvað þurfi að vera til staðar svo einstaklingar geti tekið út sína sóttkví í heimahúsum, annars þurfi þeir að dvelja á sóttkvíarhóteli.

„Það eru býsna þungar kvaðir; menn verða að vera einir í sínum híbýlum ef þeir ætla að vera einir í sóttkví, ef þeir ætla að fara heim til sín þar sem eru fjölskyldumeðlimir verða þeir líka að fara í sóttkví. Ég held að þetta sé býsna góð reglugerð,“ segir Kári en telur hana þó ekki ná sömu markmiðum og fyrri stefndi að.