Handbolti

KA-menn með flest stig allra liða í febrúar

Óskar Ófeigur Jónsson skrifar
Árni Bragi Eyjólfsson og félagar í KA-liðinu eru að gera flotta hluti í Olís deildinni þessa dagana.
Árni Bragi Eyjólfsson og félagar í KA-liðinu eru að gera flotta hluti í Olís deildinni þessa dagana. Vísir/Hulda Margrét

Ekkert lið í Olís deild karla í handbolta hefur halað inn fleiri stig í febrúarmánuði en lið KA á Akureyri sem er taplaust í mánuðinum.

KA-menn komu örugglega mörgum á óvart með því að vinna topplið Haukanna í KA-húsinu í gærkvöldi en miðið við síðustu leiki var þessi sigur engin tilviljun. Það var nefnilega allt annað KA-lið sem mætti til leiks eftir kórónuveiruhléið langa.

KA-menn komust í 7-1 í upphafi leiks á móti Haukunum, voru 16-14 yfir í hálfleik og unnu leikinn á endanum 30-28.

KA-liðið varð þar með fyrsta liðið til að vinna lærisveina Arons Kristjánssonar á þessu ári en eina deildartap Hauka á tímabilinu kom á móti Val 2. október síðastliðinn eða fyrir 146 dögum.

KA-menn léku jafnframt sinn sjötta deildarleik í röð án þess að tapa. Þeir hafa ekki tapað síðan að liðið missti niður góða forystu á móti Aftureldingu í lokaleik sínum í janúarmánuði.

KA var 19-15 yfir þegar seinni hálfleikurinn var hálfnaður en Mosfellingar unnu síðustu fjórtán mínútur leiksins 10-5 og þar með leikinn með einu marki.

Síðan þá hefur KA liðið ekki tapað leik og norðanmenn hafa náð alls í tíu stig í febrúar með því að vinna fjóra leiki og gera tvö jafntefli.

Ekkert lið hefur náð í fleiri stig í febrúar en KA er með stigi meira en bæði Stjarnan og Haukar.

Í febrúar hefur KA-liðið unnið ÍR, ÍBV, Þór Ak. og Hauka og síðan gert jafntefli við FH og Val. Í leikjunum á móti FH og Val þá björguðu KA-menn stiginu með frábærum endakafla og með því að skora fjögur síðustu mörk leiksins.

Flest stig liða Olís deildar karla í handbolta í febrúar:

  • KA 10 stig
  • Stjarnan 9 stig
  • Haukar 9 stig
  • FH 8 stig
  • Selfoss 8 stig
  • Valur 5 stig
  • Grótta 5 stig
  • Fram 5 stig
  • Afturelding 4 stig
  • ÍBV 3 stig
  •  Þór Ak. 2 stig
  • ÍR 0 stig
  • Flestir sigrar í Olís deildar karla í febrúar:
  • KA 4
  • Stjarnan 4
  • Haukar 4
  • Selfoss 4
  • FH 3
  • Fæst töp í Olís deildar karla í febrúar:
  • KA 0
  • FH 0
  • Stjarnan 1
  • Haukar 1
  • Valur 2
  • Grótta 2
  • Fram 2



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.