Innlent

Ríkissjóður aldrei fengið betri lánakjör

Heimir Már Pétursson skrifar
Fjármálaráðherra segir það til marks um traust á Íslandi að lánadrottnar vilji að íslenska ríkið geymi mikla fjármuni fyrir þá vaxtalaust í sjö ár.
Fjármálaráðherra segir það til marks um traust á Íslandi að lánadrottnar vilji að íslenska ríkið geymi mikla fjármuni fyrir þá vaxtalaust í sjö ár. vísir/vilhelm

Ríkissjóður hefur aldrei fengið hagstæðari kjör en vaxtalaust lán í nýlegu skuldabréfaútboði upp á 750 milljónir evra. Fjármálaráðherra segir markaðinn treysta Íslandi til að geyma þetta fé fyrir sig í sjö ár.

Til nokkurrar einföldunar má segja að ríkissjóður hafi eingöngu tekið erlend lán á undanförnum árum til að greiða niður eldri lán á betri kjörum. Bjarni Benediktsson fjármálaráðherra segir að nú taki ríkissjóður hins vegar erlent lán upp á um 117 milljarða króna til að greiða niður halla ríkissjóðs vegna kórónuveirufaraldursins og hafi aldrei fengið betri kjör.

„Það er einmitt þannig. Við höfum aldrei séð jafn hagstæð kjör fyrir íslenska ríkið. Við gáfum út 750 milljónir evra sem eru já rétt um 17 milljarðar króna. Við borgum enga vexti á þessum evrum í sjö ár. Þannig að það má eiginlega segja að markaðurinn sé að treysta Íslandi til að geyma peningana fyrir sig í sjö ár og bara passa upp á verðgildi þeirra. Það er ekki farið fram á vexti,“ segir Bjarni.

Bjarni Benediktsson segir ríkissjóð ætla að stoppa upp í gríðarlegt fjárlagagat með fjölþættum aðgerðum.Stöð 2/Arnar

Og raunar bauðst ríkissjóði að fá um fjórfalt meira að láni en óskað var eftir með um 0,1 prósent ávöxtunarkröfu.

Bjarni segir þetta ánægjulega niðurstöðu og styrki stjórnvöld í að beita fjölbreittum úrræðum við fjármögnun fjárlagahallans. Þessi skuldabréfaútgáfa auki trúðverðugleika stjórnvalda við mjög krefjandi aðstæður.

„Við þurfum auðvitað að leggja fram trúverðuga áætlun fram í tímann um hvernig við ætlum að loka fjárlagagatinu og komast upp úr þessari holu sem við erum í. Við erum með alveg geigvænlegan halla í augnablikinu. En við trúum því að það sé rétta stefnan til að styðja við hagkerfið á erfiðum tímum og erum ánægð með að hafa getu til að veita þann stuðning,“ segir Bjarni.

Bjartsýnn á sanngjarnt verð fyrir hluti í Íslandsbanka

Ríkissjóður muni einnig taka lán innlands og selja eignir til að stoppa upp í fjárlagagatið. Þar munar mest um áform um sölu á allt að þrjátíu og fimm prósenta hlut í Íslandsbanka sem ríkið vilji fá sanngjarnt og gott verð fyrir.

„Ef markaðurinn ætlar ekki að borga það sem okkur finnst vera sanngjarnt þegar allt er tekið með í reikninginn munum við ekki halda áfram með söluna. Þá munum við bíða betri tíma. Þetta er eitt af stóru atriðunum sem þarf að leggja mat á en ég hef ágætis væntningar miðað við markaðsaðstæður almennt og styrk bankans um að við getum fengið sanngjarnt verð,“ segir fjármálaráðherra.

Almenningur sýndi Icelandair mikinn áhuga. Ertu að vona að það endurtaki sig þarna?

„ Já, ég held að það sé mikið heilbrigðismerki að fleiri komi aftur inn á hlutabréfamarkaðinn. Við vorum með miklu ríkari almenna þáttöku á hlutabréfamarkaði á fyrsta áratug þessarar aldar. Það hefur dregið mjög úr því að hluta til vegna þess að við höfum verið að auka það hlutfall sparnaðar heimilanna sem fer beint inn í lífeyriskerfið,“ segir Bjarni Benediktsson.


Tengdar fréttir

Fjármálaráðherra segir ganga vel að fjármagna halla ríkissjóðs

Eftir hallalaus og hallalítil fjárlög undanfarin ár verður gríðarlegur halli á fjárlögum þessa árs og næstu ára. Hallinn er jafnvel meiri en á árunum eftir bankahrun. Fjármálaráðherra segir hins vegar vel hafa gengið að fjármagna hallann enda er ríkissjóður skuldlítill.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.