Viðskipti innlent

Átta skip í ákafri loðnuleit: „Nú á hún ekki að sleppa“

Kristján Már Unnarsson skrifar
Höfn í Hornafirði er meðal þeirra byggða sem eiga mikið undir. Ásgrímur Halldórsson við bryggju. Vinnsluhús Skinneyjar-Þinganess við hliðina.
Höfn í Hornafirði er meðal þeirra byggða sem eiga mikið undir. Ásgrímur Halldórsson við bryggju. Vinnsluhús Skinneyjar-Þinganess við hliðina. Stöð 2/Arnar Halldórsson.

Loðnuleitin sem hófst um síðustu helgi er orðin mun umfangsmeiri en áður var gert ráð fyrir. Í fyrstu var miðað við þrjú til fjögur skip en núna eru þau orðin átta talsins, tvö rannsóknarskip Hafrannsóknastofnunar og sex uppsjávarveiðiskip frá útgerðum; öll að leita loðnunnar.

„Nú á hún ekki að sleppa,“ segir Sigurður Guðjónsson, forstjóri Hafrannsóknastofnunar.

Sigurður Guðjónsson, forstjóri Hafrannsóknastofnunar.Egill Aðalsteinsson

„Ég hugsa að þetta fari að nálgast Íslandsmet,“ svarar hann spurður hvort áður hafi verið lagt í svo viðamikinn leiðangur.

Rannsóknaskipið Bjarni Sæmundsson fór af stað úr Hafnarfirði í morgun og skömmu síðar sigldi fiskiskipið Hákon ÞH úr Reykjavík. Bjarni stefnir á Vestfirði til að kanna Grænlandssund en þar hefur hafísjaðarinn, sem áður hindraði leit, eitthvað hopað. Hákon mun hins vegar leita grunnt undan Norðurlandi.

Rannnsóknaskipið Árni Friðriksson, sem lagði upp frá Hafnarfirði síðastliðinn sunnudag, leitaði fyrst á Austfjarðamiðum en stefnir núna einnig á Vestfjarðamið. Hann var í dag á siglingu vestur með Norðurlandi.

Ferlar leitarskipanna átta síðdegis í dag.Hafrannsóknastofnun

Auk Árna hófu fjögur fiskiskip að leita undan Austfjörðum í byrjun vikunnar; Ásgrímur Halldórsson SF, Aðalsteinn Jónsson SU, Börkur NK og Bjarni Ólafsson AK. Núna hefur Jóna Eðvalds SF einnig bæst við. Fjögur fyrrnefndu skipin stefna norður á bóginn á Norðausturmið en Jóna Eðvalds stefnir á hafsvæðin undan sunnanverðum Austfjörðum.

Hér má sjá leitarferla skipanna.

Sjávarútvegsráðherra gaf í gær út 61 þúsund tonna loðnukvóta. Ætla má að íslensk skip fái rétt um helming þess kvóta sem dugar hverju skipi vart í nema eina til tvær veiðiferðir.

Bjartsýni ríkir hins vegar innan sjávarútvegsins um að leitin skili mun meiri kvóta, að sögn Ásgeirs Gunnarssonar, framkvæmdastjóra veiða og vinnslu hjá Skinney-Þinganesi á Hornafirði. Hann telur að aldrei fyrr hafi jafnmörg skip verið í skipulagðri loðnuleit og veðurspá sé einnig þokkaleg.

Ásgeir Gunnarsson, framkvæmdastjóri veiða og vinnslu hjá Skinney-Þinganesi.Stöð 2/Arnar Halldórsson.

„Ég spái 220 þúsund tonna vertíð,“ segir Ásgeir.

Hann telur þó að veiði hefjist vart fyrr en undir miðjan febrúar þegar komin sé góð hrognafylling og loðnan orðin verðmætari.

En hvenær má svo búast við niðurstöðum úr loðnuleitinni?

„Upp úr næstu helgi, þá verða fregnir,“ svarar forstjóri Hafrannsóknastofnunar.


Tengdar fréttir

Ráðherra fagnar að tekist hafi að afstýra loðnubresti

Kristján Þór Júlíusson, sjávarútvegs- og landbúnaðarráðherra, gerði á fundi ríkisstjórnarinnar í morgun grein fyrir því að hann hefði í samræmi við ráðgjöf Hafrannsóknastofnunar undirritað reglugerð um veiðar á loðnu.

Loðnustofninn metinn nægilega sterkur til að hefja loðnuveiðar

Loðnuveiðar íslenskra skipa geta hafist að nýju eftir tveggja ára hlé, samkvæmt nýju mati Hafrannsóknastofnunar á ástandi loðnustofnsins, sem birt var í dag, eftir mælingar á loðnutorfum sem fundust á Austfjarðamiðum um síðustu helgi. Stofnunin leggur til að veiðikvóti verði aukinn úr 22 þúsund tonnum upp í 54.200 tonn, sem dugar til að hægt verði að gefa út kvóta til íslenskra skipa.

Fyrsta loðnan veiðist á Íslandsmiðum í þrjú ár

Fyrsta loðnan sem veiðist á Íslandsmiðum í þrjú ár fékkst á Austfjarðamiðum í gærkvöldi þegar grænlenska skipið Polar Amaroq fékk milli tuttugu og þrjátíu tonn í einu kasti. Síldarvinnslan í Neskaupstað á þriðjungshlut í grænlensku útgerðinni en yfirmenn um borð eru íslenskir.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×