Handbolti

Öruggt hjá Norð­mönnum á meðan Sví­þjóð og Slóvenía gerðu jafn­tefli

Runólfur Trausti Þórhallsson skrifar
Það var allt í járnum í leik Slóveníu og Svíþjóðar í kvöld.
Það var allt í járnum í leik Slóveníu og Svíþjóðar í kvöld. EPA-EFE/Mohamed Abd El Ghany

Síðustu leikjum dagsins í milliriðlum á HM í handbolta er nú lokið. Norðmenn unnu 13 marka stórsigur á Alsír í milliriðli þrjú á sama tíma og Svíþjóð og Slóvenía gerðu jafntefli í milliriðli fjögur.

Noregur vann þægilegan 13 marka sigur á Alsír, 36-23, og lyftu sér þar með upp í annað sæti milliriðils. Alexandre Blonz var markahæstur í liði Noregs með sjö mörk, líkt og Abdi Ayoub í liði Alsír. Sandor Sagosen skoraði sex mörk í norska liðinu ásamt því að gefa fimm stoð sendingar.

Í milliriðli fjögur lauk stórleik Slóveníu og Svíþjóðar með 28-28 jafntefli. Svíar lyfta sér þannig upp í annað sæti riðilsins með sex stig, líkt og topplið Egyptalands. Slóvenía fer upp í fimm stig og segja má að það sé mikil spenna í riðlinum fyrir lokaumferð riðilsins.

Leikurinn var í járnum frá upphafi til enda en Svíar leiddu með einu marki í hálfleik, 15-14. Slóvenar unnu síðari hálfleikinn með einu marki og leiknum lauk því með jafntefli.

Hampus Wanne skoraði sjö mörk í liði Svía og var markahæstur. Dragan Gajić var markahæstur í liði Slóveníu með sex mörk úr aðeins sex skotum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.